له‌ په‌ندنامه‌ى ژیانى سه‌روه‌ران ئيبڕاهیم‌ و ئيسماعیلدا

له‌ په‌ندنامه‌ى ژیانى سه‌روه‌ران ئيبڕاهیم‌ و ئيسماعیلدا

له‌گه‌ڵ هه‌ڵهاتنى مانگى (ذی الحجة)ى هه‌ر ساڵێك و ده‌ستپێكردنى كۆنگره‌ى بێ وێنه‌ى نێونه‌ته‌وه‌یى حه‌جدا، جێى خۆیه‌تى یادێكى پێشه‌نگانى (گوێڕایه‌ڵیى) و (فیداكاریى) ئیبڕاهیم‌ و ئیسماعیل دروودى خوایان له‌سه‌ر بێ، بكه‌ینه‌وه‌ و له‌ ڕوانگه‌ى په‌ندنامه‌ى ژیانى پڕ له‌ خه‌بات‌ و خۆبه‌ختكردن‌ و پابه‌ندییانه‌وه‌، چه‌ند وانه‌یه‌كى به‌رز و پڕبه‌ها هه‌ڵگۆزین.   

له‌ڕاستیدا ئه‌و دوو پێغه‌مبه‌ره‌ سه‌روه‌ره‌، خواى گه‌وره‌ كردوونى به‌ مامۆستاى گرۆى ئاده‌میزاد، به‌تایبه‌تى له‌ دوو بوارى گرنگدا:

یەکەم: بوارى پابه‌ندیی‌ و گوێڕایه‌ڵیى له‌بڕیار و فه‌رمانى خواى خاوه‌نى بوونه‌وه‌ر.

دووه‌م:  بوارى له‌خۆبورده‌یى‌ و فیداكاریى‌ و خۆنه‌به‌ستنه‌وه‌ به‌ دونیاوه‌.

بۆ یه‌كه‌میان ئیبڕاهیمى باوكى پێغه‌مبه‌ران سكێجێكى به‌رزى بۆ داناوین. بۆ دووه‌میشیان ئیسماعیلى كوڕى، گه‌وره‌ترین‌ و ڕوونترین تابڵۆى له‌ ێشانگاى (فیداكاریى)دا هه‌ڵواسى. ئه‌و نموونه‌ و سكێجه‌ به‌رزه‌ى كه‌ سه‌روه‌رى پێغه‌مبه‌ران ئیبڕاهیم (سڵاوی خوای لێ بێ) داینا، ئه‌و كاته‌ بوو كه‌ دروشمى ته‌سلیمبوون به‌ خوداى هه‌ڵبڕى: (إذ قال له ربه أسلم، قال أسلمت لرب العلمين). هه‌ر له‌و كاته‌وه‌ خواى گه‌وره‌ چه‌ندین خه‌ڵاتى پێ دا و وه‌سفدارى كرد به‌ چه‌ند ڕه‌وشتێك كه‌ هیچ نێرراوێكى ترى خوا بەو جۆرە گشتگیرە وه‌سفدار نه‌كراوە. بۆیه‌ گه‌واهینامه‌ى: (قد صدقت الرؤيا)ى پێ دا و ده‌رباره‌ى فه‌رمووى: (إِنَّ إِبْرَاهِيمَ كَانَ أُمَّةً قَانِتًا لِلَّهِ حَنِيفًا وَلَمْ يَكُ مِنَ الْمُشْرِكِينَ (١٢٠) شَاكِرًا لِأَنْعُمِهِ اجْتَبَاهُ وَهَدَاهُ إِلَى صِرَاطٍ مُسْتَقِيمٍ (١٢١) وَآتَيْنَاهُ فِي الدُّنْيَا حَسَنَةً وَإِنَّهُ فِي الْآخِرَةِ لَمِنَ الصَّالِحِينَ)   

به‌ڵێ، به‌ ڕاستیى هه‌ر شایانى ئه‌وه‌یه‌ كه‌ به‌ ته‌نیا بۆ خۆى ئوممه‌تێك بێ، ملكه‌چى خوا بێ، یه‌كتاپه‌رست بێ، له‌گه‌ڵ هاوه‌ڵدانه‌ران نه‌بێ، سوپاسگوزارى خودا بێ، هه‌ڵبژارده‌ بێ، له‌سه‌ر ڕێى ڕاست بێ، خۆشیى‌ و جوانیی‌ وحه‌سه‌نه‌ى دونیاى پێ درابێ، له‌ دواڕۆژیشدا له‌ زومڕه‌ى ساڵحین بێت. نه‌ك هه‌ر ئه‌وه‌نده‌، له‌وه‌ش زیاتر، خه‌ڵاتى پێشه‌وایى گرۆى مرۆڤ، ته‌نانه‌ت پێغه‌مبه‌رانیشى پێ درا: (إنى جاعلك للناس إماما)... ئاخر له‌ گۆتره‌ نه‌كرا به‌ پێشه‌وا. ئه‌و به‌ دڵێكى ساغ‌ و سه‌لیمه‌وه‌ به‌ره‌و خودا كه‌وته‌ ڕێ: (إذ جاء ربه بقلب سليم)، بۆیه‌ خوداى گه‌وره‌ خه‌ڵاتى (ڕوشد) و ته‌واویى پێ به‌خشی: (ولقد آتينا إبراهيم رشده). هه‌روه‌ها نموونه‌كانى گه‌وره‌یى خۆى له‌ بوونه‌وه‌ردا پیشان دا و بردییه‌ ڕیزى كه‌سه‌ دڵنیا و ته‌واو خواناسه‌كان: (وَكَذَلِكَ نُرِي إِبْرَاهِيمَ مَلَكُوتَ السَّمَاوَاتِ وَالْأَرْضِ وَلِيَكُونَ مِنَ الْمُوقِنِينَ).

بێهووده‌ش نییه‌ كه‌ خوا پێگه‌ و مه‌قامى زۆر گه‌وره‌ى بداتێ.    ئه‌و پێغه‌مبه‌ره‌ سه‌رچاوه‌ى چه‌ندین ڕه‌وشتى به‌رز بوو، ئه‌وه‌تا خواى گه‌وره‌ خۆى وه‌سفى ده‌كا به‌: (حلیم) و (أوّاه) و (منیب) و (صدّیق) و (خلیل) و (حنیف) و (موقن): (إِنَّ إِبْرَاهِيمَ لَحَلِيمٌ أَوَّاهٌ مُنِيبٌ)، (وَاذْكُرْ فِي الْكِتَابِ إِبْرَاهِيمَ إِنَّهُ كَانَ صِدِّيقًا نَبِيًّا). بۆیه‌ سڵاوى تایبەتی خۆى بۆ ده‌نێرێ: (سلام علی ٳبراهیم)، بۆیه‌ هه‌ركه‌سیش پشت له‌ بیروبڕواى ئه‌و پێغه‌مبه‌ره‌ بكا به‌ (سفیه) و نه‌زانكار ده‌یناسێنێ: (وَمَنْ يَرْغَبُ عَنْ مِلَّةِ إِبْرَاهِيمَ إِلَّا مَنْ سَفِهَ نَفْسَهُ).   

به‌ڵێ، باوكى ئاوا، ده‌بێ كوڕى هه‌روه‌ك ئیسماعیلى ببێ، كه‌ خوا وه‌سفى ئه‌ویش ده‌كا به‌ ڕاستگۆ و خاوه‌ن بەڵێن و په‌سه‌نكراو: (وَاذْكُرْ فِي الْكِتَابِ إِسْمَاعِيلَ إِنَّهُ كَانَ صَادِقَ الْوَعْدِ وَكَانَ رَسُولًا نَبِيًّا (٥٤) وَكَانَ يَأْمُرُ أَهْلَهُ بِالصَّلَاةِ وَالزَّكَاةِ وَكَانَ عِنْدَ رَبِّهِ مَرْضِيًّا) مه‌ريه‌م. ده‌بێ كوڕى واى بداتێ كه‌ له‌ به‌رامبه‌ر فه‌رمانى خواوه‌ به‌ باوكى بڵێ: (افْعَلْ مَا تُؤْمَرُ سَتَجِدُنِي إِنْ شَاءَ اللَّهُ مِنَ الصَّابِرِينَ) به‌ڵێ، به‌ ڕاستى له‌ بۆنه‌یه‌كى وادا ده‌بێ ئه‌و سه‌روه‌رانه‌ له‌م بوارانه‌دا سه‌رمه‌شقمان بن:

١- بوارى ئیلتزام‌ و گوێڕایه‌ڵیى له‌ فه‌رمانى خوا.

٢- بوارى فیداكاریى‌ و له‌خۆبورده‌یى‌ و دلّخۆشكردن به‌ پاداشتى خوا.

٣- بوارى دڵنیایى له‌ حه‌قانییه‌تى به‌رنامه‌ و شه‌ریعه‌تى خواى گه‌وره‌.

٤- بوارى ڕاستگۆیى‌ و په‌یمان بردنه‌سه‌ر.

٥- بوارى خواناسیى‌ و یه‌كتاپه‌رستیى‌ و دڵساغیى‌ و له‌خواترسان.   

ئه‌مانه‌ به‌شێكن له‌ په‌ندنامه‌ى ژیانیان، ئێمه‌ش كه‌ پێڕه‌وانى ئه‌وانین، ده‌بێ به‌ پێشه‌نگیان دانێین‌ و مه‌رجى موسڵمانێتیى به‌رینه‌ سه‌ر، (موسڵمانێتیى) ئه‌و مه‌دالیا پیرۆزه‌ى خوا پێى ڕه‌وا بینیوین‌و له‌سه‌ر زمانى ئیبراهیم ناوى لێ ناوین: موسڵمان: (هو سماكم المسلمين من قبل).خوای گەورە لە پێڕەوانی پایەداری ئەو سەروەرانەمان حیساب بکات. 

ده‌نگێ نه‌دراوه

.:: نوێ‌ترین ::.