قوڕئان لە نێوان یار و نەیارانیدا

ن: ئازاد موحه‌ممه‌د به‌رگركه‌یی 

قوڕئانی پیرۆز ئەو تاکە کتێبە خواییە نێردراوە پارێزراوەیە کە وەک گەورەترین پەرجو بۆ سەر گەورەترین پێغەمبەر "موحه‌ممه‌د" دروودی خوای لەسەر بێ و ئوممەتەکەی دابەزێنراوە، کە بەکەتەلۆکی مرۆڤایەتی و جوانترین یاسا و گەورەترین ڕێنوێنی کار و یەکەم سەرچاوەی تەشریع دادەنرێ، خوا خۆی بەڵێنی پارێزراوی داوە ئەفەرموێت: «نحن نزلنا الذكر وانا له لحـفظون»
واتە: ئێمە قوڕئانمان دابەزاندووە هەر خۆشمان ئەیپارێزین. بێگومان مرۆڤ باڵی داوەتە بەرئەم ئەمانەتە گەورەیە کە خوا ئەفەرموێ پێشنیازمان بۆ ئاسمانەکان و زەوی و چیاکان کرد، کەچی مرۆڤ شانی دابەر و هەڵی گرت، بێگومان مرۆڤ نەزان و ستەمکارە (وحملها الانسان انه كان ظلوما جهولا) بۆیە هەرچەندە بەرپرسیارەتێکی ئێجگار گەوریە، بەڵام لەبەرامبەریشدا گەر کاری پێ بکرێ و قەدری بزانرێ، ئەجر و پاداشتێکی گەورەشە، ئەم قوڕئانە هێندە مەزن و بەساف و پڕ هەیبەتە، خوا دەفەرموێ گەر بهاتایە بەسەر چیاکانماندا دابەزاندبا، خۆیان لەبەر نەده‌رگرت و لەترسی خوا ورد و خاشاک و هەپڕون هەپڕون دەبوون: «لو انزلنا هذا القرآن علی جبل لرأیته خـشعا متصدعا من خشیة الله» و گەورەترین هۆکاری هیدایەت و بەشاڕەت و مزگێنیشە بۆ ئیمانداران، خوا دەفەرموێ: «ان هذا القرءان یهدی للتی هی اقوم» و شیفا و ڕەحمەت و بەرەکەتیشە بۆیان، خوا دەفەرموێ: «وننزل من القرءان ماهو شفاء ورحمة للمٶمنین ولا یزید الظـلمین الا خسارا» و دەفەرموێ: «هدی للناس وبینات من الهدی والفرقان». یەکەم کتێبێکە کە بیست و چوار کاتژمێر بێ پچڕان ئەخوێندرێتەوە و تاکە کتێبێکە بەسەیرکردن و خوێندنەوەی پاداشتت پێ دەگا و تاکە کتێبێکە خوا لە یەکەم پەڕاو و دەسپێکا، تەحددا دەکا کە هیچ گومان و هەڵە و پەڵەیەکی تێدا نییه‌، دەفەرمێ: «الــم٭ذلك الكتاب لا ریب فیه» و خوا دڵنیاییمان پێ ئەدا کە لای خۆی نێردراوە، دەفەرموێ: « افلا یتدبرون القرءان ولو كان من عند غیر لله لوجدوا فیه اختلافا كثیرا) دەی قوڕئانێک بێ ئەم هەموو بەشاڕەت و هیدایەت و شیفا و ڕێنمایی و ڕەحمەت و ڕوونکردنەوە و زانست و شتە سەرسوڕهێنەرەی تێدابێ، دەی بێگومان نەیار و ناحەزانی چاویان پێ هەڵنایێ و هەرچی لەدەستیان بێ درێغی ناکەن بۆ دوورخستنەوەی موسڵمانان لێی و لەکارخستن و لەبەر چاو و دڵ خستنی ئیمانداران.
بەڵام هەر زوو خوا خاترجەمی کردن و بێمنەتی کردن لەوەی کە بەهیچ کڵۆجێ ناتوانن نە دەسکاری بکەن نە هەڵەیەکی لێ بگرن، بۆیە لەداخان دەتۆقن، خوا پێیان دەفەرموێ: «قل موتوا بغیظكم ان الله علیم بذات الصدور» خوا دەفەرموێ «ختم اللە علی قلوبم وعلی سمعهم وعلی ابصـرهم غشاوة ولهم عذاب عظیم» خوا مۆری ناوە بەسەر دڵ و چاو و گوێیان و خوا ئێشێکی بەئازاری گەورەی بۆ بڕیار داون و دەربارەی ئەوانەی کاری پێ ناکەن، پێیان دەفەرموێ: «ومن لم یحكم بما انزل الله فاولـئك هم الكافرون٭هم الظـلمون٭هم الفـسقون» ئەو دڵەی بەرامبەر قوڕئان ڕاناچڵەکێ، خوا بە بەردی وێنا دەکا، بەڵکوو ڕەقتر لە بەرد و دەفەرموێ: «ثم قست قلوبكم من بعد ذلك فهی كالحجارة او اشد قسوة» و دەفەرموێت: «افلا یتدبرون القرءان ام علی قلوب اقفالها» و هەر کەسێ پشت لەم قوڕئانە بکا و یان لەبیرەخۆی باتەوە و پشت گوێی خات، ژیانی پڕ لە تەنگ و چەڵەمە و ناخۆشی دەبێ و بەکۆرەیی حەشر ده‌کرێ، دەفەرموێ: «ومن اعرض عن ذكری فان له معیشة ضنكا ونحشره یوم القیامة اعمی» بۆیە ئێمەی ئوممەتی ئیسلام و هەڵگرانی ئەم پەیامە ده‌بێ زۆر هوشیار و زرینگ بین و بگەڕێینەوە سەر ڕێبازی قوڕئان و پشتی لێ نەکەین، ئەگینا پێغەمبەری نازدار و سەروەرمان شەکوا و ساکاڵامان لێ دەکا، ده‌فەرموێ: «وقال رسول یـرب ان قومی اتخذوا هذا القرءان مهجورا» و لەو ڕۆژە ترسناکە ئاگاداری کردوینەتەوە کە ڕۆژێک دێ ئایه‌تەکانی قوڕئان نامێنن و تەنها پەڕ و بەرگەکەی دەمێنێتەوە، ئیمامی عەلیش ڕەزای خوای لەسەر بێ، دەفەرموێ ڕۆژێ دادێ ئەم قوڕئانە هیچی لێ نامێنێتەوە، جگە له وێنەکەی (لا یبقی من الاسلام الا اسمه، ولا من القرءان الا رسمه) بۆیه‌ بەداخەوە ئەڵێین ئەگەر ئێستا قوڕئان پەڕەکانی فڕێ بدرێن، بەڵام زۆر دەمێکە ڕوحی قوڕئانمان لەناودا نەماوە و پشت گوێ خراوە، ڕۆژێکی لەخزمەت مامۆستایەکی بەڕێزدا بووم، فەرمووی ئێستا جیهان زۆر برە و بایەخ بە پێشبڕکێی قوڕئان دەدا لەڕووی ئاواز و مەقامات و تەجویدەوە، کەچی بەداخەوە لە مانا و ناوەڕۆکی نزیک نابنەوە و ئیشی لەسەرناکرێ، ئیدی ئەو قوڕئانە سروشتی وایە لەهەر شوێنێ بێ یان هەرکەس هەڵگری بێ، گەورە دەبێ، ئەوەتە حەزرەتی جبریل بەهۆی هاوردەکردنی بوو بە گەورەی فریشتەکان، حەزرەتی سەروەرمان بەم هۆیەوە بوو بە گەورەی پێغەمبەران سەلامی خوایان لەسەر بێ، شاری مەککە و مدینە بوونە گەورەترین شارەکانی سەر ڕووی زەوی، ڕەمەزان بووە گەورەترینی مانگەکان چونکە لەو مانگەدا دابەزی، قورئان هەندێ کەس گەورە دەکا و هەندێکیش نزم، وەکوو

خۆشەویستمان دروودی خوای لەسەر بێ دەفەرموێ: [ان الله یرفع بهذا الكتاب اقواما ویضع به الاخرین] قوڕئان یان بەڵگە و شەفاعەتکارە لەگەڵمان یان لەسەر و دژمان، هەر سەروەرمان دەفەروێت: [والقرءان حجة لك او علیك]
بەسە بۆ گەورەیی قوڕئان کە:
بەخوێندنەوەی یەک پیت ۱۰ خێرت بۆ بنوسرێ.
لەڕۆژی قیامەت شەفاعەت و تکات بۆ بکا.
باشترینتان ئەوانەن کە فێرکار و فێرخوازی قوڕئانن.
بەقەد لەبەرکردن و ئیشپێکردنی پلەکانت لە بەهەشت بەرز دەبنەوە.
ئەهلی قوڕئان ئەهلی خوا و نزیکانی ئەون.
باشترین چاکەت دەستەکەوێ لێی.
ئەبیە یەکێک لەوانە دروستە حەسادەتت و غیبته‌ت پێ ببردرێ.
لە پێشترین کەسەبی بۆ پێش نوێژی و ئیمامەت.
تایبەتمەندییەکانی ئەم قوڕئانە پیرۆزە
کتاب الهی: وا تە لتنزیل رب العالمین.
کتاب محفوظ: بما استحفظوا من كتاب الله.
كتاب معجز: فلیأتوا بحدیث مثله ان كانوا صادقین.
كتاب مبین میسر: ولقد یسرنا القرءان للذكر فهل من مدكر.
كتاب الدین كله: ماهی الا حیاتنا الدنیا نموت ونحیا وما یهلكنا الا الدهر.
كتاب الزمن كله: فان خفتم الا تعدلوا فواحدة.
كتاب الانسانیة كلها: ان هو الا ذكر للعالمین.
ئەمانەش بەشێکی ترن لەتایبەتمەندییەکانی:
کاریگەری لەسەر دڵەکان جێ دێڵێ
لەسینگەکان خەزنە
دژایەتی لەگەڵ زانستە سەردەمییەکاندا نییە
ڕێگەنەدراوه‌ هه‌رکه‌سه‌ بە بیر و ڕای خۆی تەفسیری بکات
لەسەر حەوت شێواز خوێندنەوە دابەزیوە
تەحەدای بێ باوەڕان دەکا کە هاوشێوەی بێنن
و ڕه‌وانه‌ کراوه‌ بە مەبەستی:
بیرو باوەڕی ڕاست و سەلیم
ڕێزگرتنی مرۆڤایەتی و دابینکردنی مافەکانی
فەرمانکردن بە چاکە و خۆپارێزی له‌ خراپه‌
تەزکیەی نەفس و پاکڕاگرتنی ناخ
پەروەردە و پێگەیاندن و هاوسەنگی ژیانی خێزانی
دروستکردنی ئوممەتێکی میانەڕەو و خزمەتکار
بانگخوازی و یارمەتیدان و چاکەکاری.
بۆیه‌ زۆر گرینگە دەستی پێوە بگرین و بیکەینە ویردی ڕۆژانە و بەهاری دڵان و شیفا و چارەسەری گرفتەکانمان.

بخش اخبار: 
اصلی

.:: نوێ‌ترین ::.