بۆ یه‌كه‌مجار توێژه‌ری پاوه‌یی توانی ده‌قاوده‌ق قوڕئانی پیرۆز وەرگێڕێته‌ سه‌ر زمانی کوردی

بۆ یه‌كه‌مجار توێژه‌ری پاوه‌یی توانی ده‌قاوده‌ق قوڕئانی پیرۆز  وەرگێڕێته‌ سه‌ر زمانی کوردی

عیرفان زۆمۆررۆدی، مامۆستا و توێژه‌ری پاوه‌یی دوای پێنج ساڵ هه‌وڵ و تێكۆشانی به‌رده‌وام، توانی بۆ یه‌كه‌م جار وه‌رگێڕانی قوڕئانی پیرۆز به‌ شێوازی ده‌قاوده‌ق بۆ سه‌ر زمان و ئه‌ده‌بیاتی كوردی ته‌واو بكا.

به‌پێی ڕاپۆڕتی ئیسلاحوێب، عیڕفان زۆمۆررۆدی مامۆستای قوتابخانه‌كانی شاری پاوه‌ و وانه‌بێژی زانكۆ، له‌ یه‌كه‌م ڕۆژی مانگی پیرۆزی ڕه‌مه‌زان له‌ ساڵی ١٣٩٤، یه‌كه‌م وه‌رگێڕانی ده‌قاوده‌قی قوڕئانی پیرۆزی بۆ سه‌ر زمان و ئه‌ده‌بیاتی كوردی ده‌ست پێ كرد و له‌ ٢٧ی مانگی پیرۆزی ڕه‌مه‌زانی ئه‌وساڵ (١٣٩٩) به‌ كۆتایی گه‌یاند.

عیرفان زۆمۆررۆدی خاوه‌ن بڕوانامه‌ی ماسته‌ر له‌ به‌شی مێژوو و ژیاری نه‌ته‌وه‌ ئیسلامییه‌كاندا، له‌ وتووێژ له‌گه‌ڵ ئیسلاحوێب ڕایگه‌یاند كه ئه‌و كاره‌ پیرۆز و گه‌وره‌یه‌ی به‌خاتری خزمه‌ت به‌ قوڕئانی پیرۆز، تاكه‌ كتێبی ڕێنما و ڕێنیشانده‌ری خوا و هه‌روه‌ها خزمه‌ت به‌ زمان و فه‌رهه‌نگ و ئه‌ده‌بیاتی كوردی كردووه‌. هه‌روه‌ها وتی: داوا له‌ خوای گه‌وره‌ ده‌كه‌م ئه‌و وه‌رگێڕانه له‌ مانگی پیرۆزی ڕه‌مه‌زان، مانگی به‌در و قوڕئان، به‌ به‌ره‌كه‌تی ئه‌و قوڕئانه، وه‌رگیراوی باره‌گای خۆی بكا و دوعای بڕوادارانی ڕاسته‌قینه له‌و ڕۆژه‌ ئیمانییه‌ و شه‌وه‌ نوورانی و مه‌عنه‌وییانه، قسمه‌تی وه‌رگێڕیش بكا.

ئه‌و له‌ درێژه‌دا هیواداری خۆی ده‌ربڕی كه به‌ یارمه‌تی خوای گه‌وره‌ كه خاوه‌نی ئه‌و كه‌لامه پیرۆزه‌یه‌، له‌ مه‌ودای ئه‌وساڵدا پڕۆسه‌ی چاپ و بڵاوكردنه‌وه‌ی ئه‌و به‌رهه‌مه‌ هه‌رمان و پایه‌داره‌ به‌ ئاكام بگا و ڕه‌مه‌زانی ساڵی داهاتوو بگاته ده‌ستی بڕواداران و ئه‌ویندارانی كه‌لامی ئیلاهی. زۆمۆررۆدی چه‌ند به‌رهه‌م و وه‌رگێڕانی دیکه‌شی له‌ كارنامه‌ی خۆیدا تۆمار كردووه‌ كه ئاماژه‌ به‌ سه‌ردێڕه‌كه‌یان ده‌كه‌ین:

1ـ ڕاڤه‌ی كوردی «ته‌فسیری ڕامان له‌ مانا و مه‌به‌ستی قوڕئان» به‌رهه‌می خوالێخۆشبوو مامۆستا ئه‌حمه‌د كاكه مه‌حموود له‌ زانایانی هه‌رێمی كوردستانی عێڕاق كه كاری وه‌رگێڕان، پێداچوونه‌وه‌ و پیاهاتنه‌وه‌ی بۆ كردووه‌ و له‌ لایه‌ن ناوه‌ندی بڵاوكردنه‌وه‌ی ئیحسان له‌ تاران، چاپ كراوه‌ و تا ئێستا چه‌ند جار له‌ تاران و به‌یرووت چاپ كراوه‌ته‌وه‌.

2ـ وه‌رگێڕانی كتێبی سیسته‌می سیاسی ئیسلامی و كومه‌ڵگای مه‌ده‌نی، نووسراوه‌ی دكتۆر هادی عه‌لی

3ـ وه‌رگێڕان و بڵاوكردنه‌وه‌ی جزمی «30»ی قوڕئانی پیرۆز

4ـ وه‌رگێڕان و بڵاوكردنه‌وه‌ی كتێبی «به‌ره‌و ڕزگاری»

5ـ وه‌رگێڕانی كتێبی «نه‌ورۆز و كاوه» له‌ ئاوێنه‌ی ئایین و ئه‌فسانه‌

6ـ نووسینی كتێبی «كردستان اردلان در دوره‌ی قاجاران»

ده‌نگێ نه‌دراوه