سەفەرێک بەرەو بارەگای نەورۆز

سەفەرێک بەرەو بارەگای نەورۆز

"بەناوی خوای مێهرەبان"

مزگێنی دا بە سروە بای بەهاری

وا هاتەوە نەورۆزی کوردەواری

بەتیشک تێک شکا سوپای کڕێوە

هاواری ڕۆژ گەیشتە خاکەلێوە

                         "هەژار"

 تەمەنی قورسی کاروانی زستان، بەرەو هەگبەدانانە و ئاخر هەناسەی دەکێشێ. سوپای کڕێوە و سەهۆڵبەندانیش، بە هەموو هێز و توانای خۆی و ملئەستووری زریانی شڕودڕ، لە بەرامبەر هەست و سۆزی نەورۆز، خۆی دۆڕاند و پاشەکشەی کرد.

 وا ئەوساڵیش نەورۆز بە پاڵپشتی بەهارێکی نوێ ، بەجلوبەرگی سەوزەوە،  لەشی دونیای پڕ لە مەینەت و زامداری داپۆشی و بۆ ڕزگاری سروشتی دیل و بەندکراو، ڕاپەڕی.  بە هێرشێک بەرگی سپی و سڕی بەفری لێ داماڵی و تیشکی سەوزایی خسته سەر لاشەی بێ گیانی.

نەورۆز،  ئەو وشە پڕمانایە و هەست بزوێنەیە کە بۆتە پێشەنگ و پاڵەوانی زستان بەزێن. هەموو ساڵێ لەناو جەرگە و هێزی ڕەشەمەددا، گورزی خۆی دەوەشێنێ و بە هەناسەی پڕ لە ئاوەدانی و ژیانەوە، بڵێسەی شۆڕش هەڵداییسێنێ و بارەگای بەفر و سەرمای داگیرکەر، دەلەرزێنێ.

ئەو شۆڕەسوارە دەبێتە ئاڵاهەڵگری ئازادی و کۆت و زنجیرپسان و تەخت و توناکردنی بەندیخانەکان.

هەربۆیە بۆهەموو گەلانی جیهان، بۆتە هێمای  چەخماخەی شۆڕشلێدان و دەربازبوون لە دیلی و کۆیلایەتی. 

گەلانی ئازادی خوازی ئێران و جیهان!

ئێستا لەو کات و چاخە ناسکەدا کە بۆن و بەرامی نەورۆز و هەناسە ڕوحبەخشەکەی، بالای وڵات و سرووشتی داگرتووە و لەوپەڕی سەروەریدایە. ئاواتە خوازین کە وەیشوومە و سێبەری نەگبەتی و نەهامەتی و چەوسانەوە و هەژاری و نەداری، لەسەر گشت مرۆڤەکان لاچێ  و   دونیایەکی ئاوەدان، بەپێکەوە ژیانی ئاشتییانەی هەموو ئایینەکان و گەلان بەهەر جورە فکر و زمان و کەلتوورێکەوە،  ڕەنگین و جوان  بێت. هەر کات دانیشتوانی گۆی زەوی، بەرگی تەباییان پۆشی و ئاگری فیتنەیان، خنکاند ئەوجار مروڤایەتی دەپشکوێ.

یاسای سروشتی دونیایە کە خۆرەتاوی هەر زۆردارێک، ئاوابوونێکی بەدوادایە، ئەوەی کە چەقەرەدەدا و ڕیشەی نافەوتێ و تووشی مەرگ و نەمان نابێ،  پیاوەتی و جوامێری و پێکەوەژیان و تهبایی و ڕێز و حورمەته.

نەورۆز، وانەیەکی پر لە ئەزموون و ئامۆژگارییە. گەر حکوومەتێک و فکرێک و گەلێک، لە سەدەی سەروەری و دێموکڕاسی ویاساسەروەریدا نەتوانێ، ئاڵاهەڵگری دروشمە ڕەنگینەکانیان بێ هزر و بیریان، نەزۆک و بێ بەهارە.

 پێوقەدەمی نەورۆز و چاوپشکووتنی ساڵی ۹٨ بە هەموو خەڵکی جیهان بەگشتی و هاونیشتمانانی خۆشەویشت و بەتایبەتی گەلی کورد  پێرۆزبایی دەڵێین .

ئاواتەخوازین کە ئەوساڵ بتوانین دەست لە دەست و قەوەت لە خوا، بەباوەڕێکی بەهێزتر و مەچەکێکی پۆڵایین و ورەیەکی بەرزتر، ڕەوڕەوەی ژیان، وەگەڕ خەین. 

مەزرا و کێڵگەی مرۆڤایەتی تینووی ئاوی خوشەویستییە. با ئاودێری دڵی سیسبووی یەکتر بین و باقە باقە سۆز و ئەمەگ، پێشکەشی یەکتر بکەین.

هەربژین و سەرکەوتوو بن و خوای ئازیز یاوەر و پاڵپشتی ژیانتان بێ.

 

ناوەندی پێوەندیە گشتییەکانی جەماعەتی دەعوەت و ئیسلاح ـ ئازەربایجانی رۆژاوا

 

.:: نوێ‌ترین ::.

کۆچی دوایی قارەمانێک هه‌واڵه‌کانی ئیسلاح وێب (1398/03/31)
کۆچی دوایی حاجی مامۆستا مەلا عومەر حوسینی ئایچی هه‌واڵه‌کانی ئیسلاح وێب (1398/03/31)
‍لە خودی خۆتەوە دەست پێ بکە... هه‌وارگه‌ی دڵان (1398/03/31)
کاری منداڵان و منداڵانی کار کۆمه‌ڵایه‌تی (1398/03/31)