گه‌شتی فڕۆكه‌خانه‌كانی هه‌رێم كرانه‌وه‌

وه‌زیرى ناوخۆى حكومه‌تى هه‌رێمى كوردستان رایده‌گه‌یه‌نێت، له‌مڕۆوه‌ گه‌شتى ده‌ره‌كى هه‌ردوو فڕۆكه‌خانه‌ى نێوده‌وڵه‌تى هه‌ولێر و سلێمانى كراونه‌ته‌وه‌ و چاوه‌ڕوانى ئه‌وه‌شده‌كه‌ن كێشه‌كانى تریش به‌ دیالۆگ چاره‌سه‌ربكرێت.

ئه‌مڕۆ چوارشه‌ممه‌ 14ى ئازارى 2018، له‌ هه‌ولێر هه‌ریه‌ك له‌ كه‌ریم سنجارى، وه‌زیرى ناوخۆى هه‌رێم و قاسم ئه‌عره‌جى، وه‌زیرى ناوخۆى عێراق له‌كۆنگره‌یه‌كى رۆژنامه‌وانیدا ناوه‌ڕۆكی كردنه‌وه‌ی فڕۆكه‌خانه‌كانیان ئاشكراكرد.

وه‌زیرى ناوخۆى هه‌رێم رایگه‌یاند "له‌ئێستادا گه‌شتى ده‌ره‌كى هه‌ردوو فڕۆكه‌خانه‌كان كراونه‌ته‌وه‌ و ئێمه‌ هیوادارین كێشه‌كانى ترى نێوان هه‌رێم و به‌غدا به‌هه‌مانشێوه‌ به‌ دیالۆگ چاره‌سه‌ربكرێن".

هاوكات وه‌زیرى ناوخۆى عێراق، ئاماژه‌ى به‌وه‌كرد كه‌ هیواداره‌ به‌مزووانه‌ كێشه‌كانى ترى چاره‌سه‌ربكرێت، بۆ ئه‌وه‌ى خزمه‌تى هاووڵاتیانى هه‌رێم و عێراق به‌بێ جیاوازى بكرێت.

له‌باره‌ى گۆڕینى به‌رپرس و به‌ڕێوه‌به‌رانى فڕۆكه‌خانه‌كه‌ى هه‌ولێر و سلێمانى، بێستون زه‌نگه‌نه‌، سه‌رۆكی لیژنه‌ی گواستنه‌وه‌ى په‌رله‌مانى عێراق له‌كۆنگره‌كه‌دا، وتى "ماوه‌ى سێ مانگه‌ له‌ میدیاكان و سۆشیال میدیا پڕوپاگه‌نده‌ى له‌وشێوه‌یه‌ ده‌كرێت، به‌ڵام ئه‌وان هیچى راست نین و هیچ به‌ڕێوه‌به‌ر و به‌رپرسێكى فڕۆكه‌خانه‌كان ناگۆڕدرێت".

وتیشى "یه‌كشه‌ممه‌ى داهاتوو، ليژنه‌یه‌كى هونه‌رى دێته‌ هه‌رێم و كێشه‌ هونه‌رییه‌كانى ترى نێوان هه‌ردوولا چاره‌سه‌رده‌كه‌ن".

بخش اخبار: 
اصلی