جارێكی تر كوشتنی ئایینگۆڕ (موڕتەد)

جارێكی تر كوشتنی ئایینگۆڕ (موڕتەد)

موسڵمان لە حوكمی ئیسلام بەرپرس نییە!!

بەبێ ئیسلام شتێك نییە لە دنیادا بە ناوی موسڵمان یان ئیسلامی، جا ئیدی ئەو موسڵمانە لای تۆ لە هەر ئاستێكی "ئیسلامی ڕستەقینە"دا بێت و سەر بە چ مەزهەب و تایفە و گرووپێك بێ، چ تۆ پێت راست بێ یان درۆ... لەبەر ئەوە لە هەركوێ موسڵمان هەبوو، ئیسلامیش لەوێ هەیە، ئەوەی موسڵمان دەیكات، دوور یان نزیك، ئیسلام یان بە (فاعل) -وەك مەرجەع و ئیلهامبەخشی كاری موسڵمانەكە- یان بە (مفعول بیهی) –باجدانی ئەو كارەی موسڵمانەكە دەیكا- حزووری تێیدا هەیە... لێرەوە ئەوەی زۆر جار دەگوترێ فڵان كردەوەی فڵان گرووپ یان دەوڵەتی ئیسلامی، "ئیسلام لێی بەرپرسیار نییە"، لۆژیكێكی لاوازە.

بەڵام لەگەڵ ئەم تێهەڵكێشبوونەی دین و شوێنكەوتووانی دینەكەدا، هەر دەبێ لەكاتی هەڵوێستگرتن یان شرۆڤەكردنی دیاردە پەیوەندارەكاندا، جیاوازی لە نێوان ئیسلام و موسڵماندا بكرێ، نەك تەنیا لەبەر خاتری دینەكە (ئیسلام) وەك بە زۆری –ئەگەر نەڵێین هەموو جار- دەیكەین، بەڵكوو هەندێ جار لەبەر خاتری مرۆڤە موسڵمانەكە، تا هەموو شتێكی ئیسلامیش لەسەر ئەو ماڵ نەبێ، لەكاتێكدا ڕەنگە ئەو ئیمانی بەو بەشە لە ئیسلام، یان ئەو جۆرە تێگەیشتنە لە ئیسلام نەبێت كە سەرچاوە و شەرعیەتپێدەری جۆرە كار و رەفتارێكە... چونكە مەعلومە نە ئیسلام یەك پێناسەی كۆنكرێتی هەیە كە هەرچی زانا و مەزهەبی موسڵمانە لەسەری كۆك بن، نە موسڵمانیش لەڕووی تێگەیشتن لە ئیسلام و كارپێكردنییەوە یەك پلە و جۆرە، بەڵكوو –بە هەندێک موبالەغەوە- دەتوانین بڵێین بە قەدەر ژمارەی مرۆڤە موسڵمانە (باڵق و ژیرە)كانی سەرزەوی جۆر و پلەی موسڵمانێتی هەیە... هەیە نە هیچ لە ئیسلام دەزانێ و نە بە هیچیشەوە پابەندە، تا دەگاتە ئەو سەلەفییەی كون بەكون بەشوێن حەدیس و ئەسەرێكدا دەگەڕێت تا ئیلتیزامی پێوە بكات و ئیسلام سەدلەسەد پیادە بكا...

جا ئەگەر سزای ئایینگۆڕ (موڕتەد) بەنموونە وەرگرین، كە رای شایع و زاڵی ناوەندە ئیسلامییەكە، بەكۆن و نوێوە، ئەوەیە دەكوژرێتەوە، دەبینین ئەمە –بەچاوپۆشین لەو وردە خیلافاتانەی هەن- ڕای ئیسلامە، بەڵام مەرج نییە ڕای هەموو موسڵمانان بێ، چونكە لەناو خەڵكی ئاسایی موسڵماندا هەمیشە خەڵكانێك هەبوون، هەندێ جار زۆریش بوون، بەتایبەت لە ناوەڕاستەكانی سەدەی ڕابردوودا، كە بێباوەڕیی خۆیان نەك هەر بەدینی ئیسلام، بەڵكوو بەخودایش نەشاردۆتەوە، بگرە داكۆكییان لە بێباوەڕی و بێئیلتیزامییان كردووە، بەبێ ئەوەی كەس –وەك موسڵمانی ئاسایی- پێداگری بكا كە دەبێ بكوژرێن.. ئەوەی باوەڕی بەو كوشتنە هەیە، زیاتر ناوەندی وابەستە بە ئایینە، لەویشدا ڕەوتێكی ئایدیۆلۆژیی توندڕەو باوەڕی پێی هەیە و گەر دەستی بڕوا جێبەجێی دەكا، ئەگینا باقییەكەی، كە رەنگە زۆرینەیش پێك بێنن، ئەگەر لەبەر ڕێزی حەدیسێك كه‌ لەو بارەوە هه‌یه‌ و دەڵێت "هەركەس ئاینی گۆڕی بیكوژن" و جێگیربوونی ئەو حوكمە لە مەزەبەكاندا، وەك تیۆریش باوەڕیان بە بنەماكە هەبێت، به‌ڵام بە كردەوە قەناعەتیان بە جێبەجێكردنی نییە و نەماندیوە لەناو خەڵكدا مشتومڕ(مقۆ مقۆ) لەسەر ئەوە دروست بووبێ.

لێرەدا گرنگە ئاماژە بەڕاستییەكیتر بدەین، ئەویش ئەوەیە، ئەگەرچی لە ئیسلامدا ئەو حەدیسەی سەرەوە حوكمی كوشتن بۆ ئاینگۆڕ دادەنێت و بۆتە سیمایەكی جیاكەرەوەی دینەكە، بەڵام بەدەر لەو دەقەیش، دەرچوونی كەسێك لە هەر ئایینێك، برینێكی قووڵ لە رۆحی شوێنكەوتوانی ئایینەكەدا دروست دەكات كە بەئاسانی ساڕێژ نابێ، چونكە ئایین بەلای ئاییندارەوە پیرۆزترین پیرۆزەكان و ڕاستترین ڕاستەكانی دنیایە، كە هێز و متمانە و ورە و شكۆ و بەهای پێ دەبەخشێ، جا كاتێک ئەندامێكی دێ و لە ئایینەكە هەڵدەگەڕێتەوە، بەزمانی حاڵ پێیان دەڵێ ئەوەی ئێوە بە پیرۆزی دەزانن و ئیمان و ئەخلاق و خەونەكانی دنیا و ئاخیرەتتان لەسەر بینا كردوە، وەهم و خورافە و خەیاڵپڵاوییە.. ئەم قسەیەیش بۆ ئیمانداری ئاسایی سووكایەتیكردنێكی بەئازار و شكاندنی شكۆی رۆح و قه‌ڵای به‌هاكانییەتی.. خۆ ئەگەر بچێتە ناو دینێكی تر، ئەوە برینەكە زۆر قووڵتر ئەبێ... لەبەر ئەوە زۆرجار وەك خەنجەری ناپاكی تەماشا دەكرێ!...

هەربۆیە نەك تەنیا لەناو موسڵماناندا، بەڵكوو لەناو ئاینەكاندا بە گشتی، قبووڵكردنی ئایینگۆڕین لە لایەن كۆمەڵگەی خانەخوێوە ئاسان نییە... بینیمان یەزیدییەكان چۆن بێڕەحمانە دوعایان كوشت.. سەردەمی زانكۆ، ڕۆژێكیان لە موحازەرەدا باس هاتە سەر مەسەلەی ئایینگۆڕین، تەلەبەیەكی مەسیحی خەڵكی عەینكاوەیشمان تێدا بوو، مامۆستا گوتی: كاك«...» ئەی لای ئێوە یەكێ ئایغن بگۆڕێ چی لێ ئەكەن؟ ئەویش بە پێكەنینەوە دەستی وەك چەقۆ بە پێش ملی خۆیا هێنا و وتی (قیخ!).. تا ئێستا تەنانەت لە خۆرئاواش، بەو هەموو گۆڕانكارییە فیكرییە گەورەیەوە، ئایغنگۆڕین بەبێ سەرێشە تێناپەڕێ، بەتایبەت ئەگەر لە خێزانێكی موحافیزەكاردا بێ...

لە نیوەی دووەمدا، شرۆڤەیەك بۆ حوكمی ئاینگۆڕین لە ئیسلامدا دەكەین ...

..............................

ئەم بابەت دریژەی هەیە ... 
ده‌نگێ نه‌دراوه

.:: نوێ‌ترین ::.

ڕاڤه‌ی شیعره‌ فارسییه‌كانی مه‌حوی ئه‌ده‌ب و هونه‌ر (1398/05/15)
کۆچی دوایی قارەمانێک هه‌واڵه‌کانی ئیسلاح وێب (1398/03/31)
کۆچی دوایی حاجی مامۆستا مەلا عومەر حوسینی ئایچی هه‌واڵه‌کانی ئیسلاح وێب (1398/03/31)
‍لە خودی خۆتەوە دەست پێ بکە... هه‌وارگه‌ی دڵان (1398/03/31)