بۆ پێغەمبەر (د.خ) ...

نووسەر: 
محەمەد حسەینی
بۆ پێغەمبەر (د.خ) ...

له‌بیرته‌ که‌ دوێنێ ووتیان چوون بێ‌کوڕه‌، هه‌رچی بکا لقه‌‌و جڕه‌، قاڵ و قڕه‌، وه‌جاخ کوێره‌، داری جڕه‌، هه‌ر ڕۆژێ دێ کۆتایی بێ.

له‌بیرته‌ که دوێنێ ووتیان دوابڕاوه‌ وه‌ک دارخورمای سه‌ربڕاوه‌، هه‌نه‌سسک و بێ‌وه‌جاخه‌ بێ‌به‌ر له‌ مایه‌ی ژیانه‌ سه‌ره‌نجامی خوله‌ی ژینی راوه‌ستانه‌.

له‌بیرته‌ که دوێنێ ووتیان تێکڕا هه‌موو بیکه‌ن به‌ په‌ند، گوێی پێ مه‌ده‌ن قاڵ و قوڵی بێ‌بایه‌خه‌، ئه‌گه‌ر وا بڕوا له‌م دێیه‌ ده‌نگی کزه‌ به‌بێ‌وزه‌ ده‌نگیش ناگاته‌ هیچ جێیه‌.

له‌بیرته‌ که دوێنێ ووتیان ئه‌م دواشه‌ڕه‌ به‌ بانگی وی مه‌بن خه‌ڕه‌ کاروباری هه‌مووی گه‌ڕه‌ بێ نگینێکی بێ‌فه‌ڕه‌ ته‌نیا زار و زوانی ته‌ڕه‌ هه‌رچی بکا مله‌جڕه‌، هه‌ر ڕۆژێ دێ چرای ژینی خۆی‌و دینی بکوژێته‌وه‌.

له‌بیرته‌ بۆ ڕاماڵینی بیسه‌رانی بانگه‌وازی ئاشتیخوازی چه‌نای وه‌کوو عاسی کوڕی وائیل له‌گه‌ڵ عه‌قبه‌ی کوڕی ئه‌بی‌موعیت و یا بووجه‌هل و بووله‌هه‌ب به‌بێ‌وچان به‌بێ وه‌ستان شمشێری قین دووبه‌ره‌کی ئاژاوه‌یان ده‌دا هه‌سان.

له‌بیرته‌ که ته‌پڵیان چه‌نده‌ ده‌نگی هه‌بوو، زۆریان هه‌بوو، زه‌ختیان هه‌بوو، زه‌ڕیان هه‌بوو، ته‌ختیان هه‌بوو، کۆڕیان هه‌بوو، کوڕیان هه‌بوو، نه‌فسیان هه‌بوو، شیریان هه‌بوو، قه‌ڵخان که‌وان، تیریان هه‌بوو، ئه‌وه‌یکه وا دونیاویستێ له‌و ڕۆژه‌دا پێی ده‌نازین ئی‌ئه‌وان بوو.

له‌بیرته‌ چوون ده‌وروبه‌ری ڕه‌ش و ڕووت و پێ‌په‌تی بوون به‌ره‌و هه‌ر کوێ ئه‌گه‌ر ده‌چوون کز و زه‌بوون ئه‌کرا باسیان. له‌گه‌ڵ ڕه‌ش و ڕووتا ژیان عه‌یب و عار و نه‌نگ و زیان ئه‌ژمێررا له‌بۆ ئه‌وان.

له‌بیرته‌ که‌ له‌و ماوه‌دا سوره‌ی که‌وسه‌ر ده‌یان، سه‌دان، هه‌زاره‌ها درودی خوای گه‌وره‌ی له‌سه‌ر هاته‌ خوارۆ، خێرو بێری هه‌ر نه‌بڕاوه‌ وه‌ک لێزمه‌ی باران به‌خوڕ به‌ گه‌رم و گوڕ ئه‌ڕژا به‌ سه‌ر دڵی پاکی پێغه‌مبه‌را- صلی‌الله‌علیه‌وسلم- چه‌خماخگه‌لێ نووری پێ بوو، ئاگرێکی سووری پێ بوو به‌پرشینگی ئاوڕشێنی سارای دڵی پێغه‌مبه‌ر و یارانی کرد، به‌ ئاگری بڵێسه‌ی دا به‌ داڵانی ته‌مه‌ن‌کۆنی پڕ له‌ بۆنی ڕه‌ش و تاری کۆیلایه‌تی و گرفتاری.

له‌بیرته‌ که‌ له‌ ماوه‌یه‌ک زۆر زۆر که‌ما له‌نێو ده‌ریای ده‌رد و خه‌ما دڵه‌کوێران باویان نه‌ما کۆشکی ژینیان هات به‌ده‌ما پشتی سته‌م وه‌ها چه‌ما بووکی هیوای ڕه‌ش‌و ڕووتان که‌وته‌ سه‌ما..

له‌بیرته‌ که ڕه‌وتی زه‌مان به‌ چه‌ند ته‌کان بۆ یه‌که‌مجار بۆ حه‌قویستان نیشانی دا حه‌ق به‌رده‌وام و نه‌بڕاوه‌س. زوڵم‌و سته‌م هه‌رچی بووه‌ یا هه‌رچێ هه‌س رؤژێ ده‌بێ بێده‌س‌و که‌س، سه‌ری زلی هه‌زاره‌ها وه‌ک هۆبه‌لی له‌ت‌له‌ت کرێ له‌گه‌ڵ لاتا بخرێته ژێر پێوه‌ له‌به‌ر چاوی گشتی... کووانێ ناوی ئه‌وانه‌ی‌ که به‌ئه‌وپه‌ڕی بێشه‌رمییه‌وه‌ ئاڵای شه‌ڕو ئاژاوه‌یان به‌ڕێ ده‌خست؟ کووانێ یادوبیره‌وه‌ریی بووجه‌هلان‌و بووله‌هه‌بان؟ کووانێ ده‌م‌وده‌زگای فکرو بیرو ڕچه‌و بنچینه‌یان؟ باشه‌ ئێستا له‌ ئه‌م سه‌ده‌ی بیست‌ویه‌کا دووابڕاوی حه‌ساوی کێس؟ وه‌جاخ‌کوێرو هه‌نه‌سسکی زیانمه‌ندی هه‌ره‌گه‌وره‌ی ڕه‌نجه‌ڕۆ کێس؟

به‌ڵێ گیانه‌ له‌م ژیانه‌ ئیمان‌و هه‌ق، بیرو بڕوا، خێر و چاکه‌ ناکرێ که‌ دوابڕاو بێ. کوفر و ناهه‌ق بیری پووچه‌ڵ ژینی چه‌په‌ڵ وه‌کوو ئاژه‌ڵ زه‌رق‌و برقی گۆڵت نه‌دا، سڵ نه‌که‌ی لێی هه‌رچییه‌ک هه‌س دوابڕاوو وه‌جاخ‌کوێره‌ چوونکه دژی خێرو بێره‌! ده‌سا ئیترا چاک و پتر واز له‌ ئه‌وه‌ی شه‌ڕه‌ بێره‌، ئه‌گه‌ر له‌وێ یاکوو لێره‌ وا له‌ناو هه‌ر ڕه‌نگ و پێست و لیباسێکا، ئینجا ئیتر له‌ئاستی خۆ به‌ئارامی به‌هێمنی به‌ سه‌ربه‌خۆ هێدی هێدی ته‌ماشا که‌ ئه‌وه‌ی پاکه‌ ئه‌هلی چاکه‌ له‌م ژینه‌دا شه‌وانه‌ ڕۆژ بێ‌پشوودان میلۆنه‌ها ئاده‌میزاد له‌سه‌ر پشتی ئه‌م زمه‌نینه‌ به‌ ئیمانیان به‌ ئه‌م دینه‌ سه‌ڵوات و درود و سه‌لام به‌په‌یاپه‌ی بێ‌بڕانه‌وه‌ ئه‌نێرن بۆ پێغه‌مبه‌ری گه‌وره‌ی ئیسلام. ناوی پیرۆزی پێغه‌مبه‌ر وه‌ک تاجی سه‌ر له‌بۆ به‌شه‌ر شانازییه‌... به‌ڵێ ناوی هه‌ر مایه‌وه‌ له‌ژێر په‌نای ئه‌و سایه‌وه‌ هه‌موو جیهان حه‌سایه‌وه‌ کۆیلایه‌تی له‌کار کرا په‌تی، ناوی نه‌نگی بڕایه‌وه‌. شه‌قه‌ی باڵی هه‌ڵۆی خۆشی زوڵم و زۆری چه‌نه‌ها ساڵی وا ڕاماڵی سته‌م هه‌تا ماوه‌یه‌ک زۆر تاکوو ئیسلام پیاوی هه‌بوو ناوی هه‌بوو کڵپه‌ی ئاوری کووژایه‌وه‌، ئینجا کاتێ دوور که‌وتینه‌وه‌ له‌ ئه‌م دینه‌، سته‌م هاتوو گه‌ڕایه‌وه‌، ته‌پڵی شه‌ڕی زڕایه‌وه‌، به‌ڵام ئیتر بۆ مانه‌وه‌ی ئه‌م ئیسلامه‌ هه‌موو کاتێ هه‌موو ساتێ پیاوانێک له‌دایک ئه‌بوون، به‌ هه‌وێنی ئه‌م قورئانه‌ دروس ئه‌کران له‌ هه‌ر قه‌ڕن‌و سه‌ده‌یه‌کا خۆیان ته‌نها یاکوو له‌گه‌ڵ کۆمه‌ڵێکی زۆر زۆر که‌ما، ئه‌بنه‌ کڵپه‌ی سووتێنه‌ری باخی سته‌م، له‌ژێر تیشکی نووری قورئان بۆ گشت جیهان ئه‌بنه‌ به‌ننا و ئوستادی ژین، ئه‌بنه‌ گه‌وره‌، ئه‌بنه‌ سه‌یید، ئه‌بنه‌ یارو ناسری دین...

چه‌نای وه‌کوو سه‌لاحه‌ددین ئه‌بێ له‌م دینه‌ تێبگا تاکوو به‌م دینه‌ تێ‌بگا ڕه‌وشتی ژین بۆ ئه‌م‌و ئه‌و دیاری بکا، له‌گه‌ڵ کاروانی باوه‌ڕا به‌ڕێ که‌وێ چه‌نها شه‌وان نه‌ک هه‌ر شه‌وێ بۆ ناسینی ئه‌رکی خۆی‌و کۆمه‌ڵه‌که‌ی قه‌ت قه‌ت نه‌خه‌وێ به‌ئه‌وپه‌ڕی وریابوونه‌وه‌ وره‌ بخاته‌ دڵانه‌وه‌... سا هه‌ڵگری ئه‌م په‌یامه‌ له‌م بواره‌ له‌ مێخی ژین‌ ده‌رسێ گرێ پیتی سته‌م هه‌رچی بدا به‌سه‌ر سه‌ریا سفت‌و سۆڵی و نه‌له‌خشانی زۆرتر ببێ. ده‌سا ئیتر چاک و پتر ئاماده‌ به‌ له‌گه‌ڵ ده‌ردو پێچی خه‌ما ئاشنا به‌، له‌گه‌ڵ کاروانی باوه‌ڕا وه‌ڕێ که‌وه‌ سروودی ژین، سروودی ژیان بۆ گشت ڕه‌ش و ڕووتی جیهان تۆش بخوێنه‌. له‌ژێر سایه‌ی ئه‌م قورئانه‌، له‌ ڕووناکی فه‌رمایشی پێغه‌مبه‌را، بڕۆ هه‌تا ده‌گه‌یته‌ سه‌رلووتکه‌ی ژیان... ده‌سا ئیتر پیرۆزت بێ که‌وا ناوت تۆمار کرا که‌وا له‌نێو ناوی کاروانێکا پێغه‌مبه‌ر و خاسانی خوا ڕابه‌رینی. ئه‌بێته‌وه‌ ڕۆژێ وه‌کوو هه‌موو ئه‌وان سه‌رقافڵه‌ی ئه‌م کاروانه‌ بگریته‌ ده‌ست، له‌ژێر زه‌رده‌ی خۆره‌تاوا له‌سه‌ر مله‌ بارگه‌ت بخه‌ی، لاده‌ی له‌ ڕا، ئه‌وه‌ش که‌وا به‌دواتا دێ به‌چاوی پڕفرمێسکه‌وه‌ به‌ئه‌وپه‌ڕی هه‌نێسکه‌وه‌ ئه‌ڵێ:

رَبَّنَا اغْفِرْ لَنَا وَلِإِخْوَانِنَا الَّذِينَ سَبَقُونَا بِالْإِيمَانِ وَلَا تَجْعَلْ فِي قُلُوبِنَا غِلًّا لِّلَّذِينَ آمَنُوا رَبَّنَا إِنَّكَ رَءُوفٌ رَّحِيمٌ ﴿الحشر: ١٠﴾

رَبَّنَا أَفْرِغْ عَلَيْنَا صَبْرًا وَتَوَفَّنَا مُسْلِمِينَ ﴿الأعراف: ١٢٦﴾

 

ده‌نگێ نه‌دراوه