عیرفانی حەزرەتى مەولەوى

نووسەر: 
سیروان فریدون
عیرفانی حەزرەتى مەولەوى

بە داخەوە چەند ئەدیب و نووسەرێکى کورد پێداگرى لە سەر ئەوە دەکەن کە مەولاناى کورد حەزرەتى مەولەوى شاعیرێکى عیرفانى نەبووە ، ئەڵبەتە تاوتوێکردنی ئەم بابەتە زۆر درێژە دەکێشێ ، لێرەدا تەنیا چوارینەیەکى ئەم شاعیرە مەزنە دەخەینە روو و بە پێی توانا راڤەی دەکەین ، ئەوجا بڕیار بدەن کە ئایا حەزرەتى مەولەوى شاعیرێکى عیرفانى بووە یان نا...

حەزرەتى مەولەوى دەفەرمێ :

تـــا تەوانـــام بـی شـــەو بێــــداریم کەرد

پــــەرێ نۆشــــاى جام بـێ قەراریم کەرد

وێت واتــــەن هــەرکـەس شەوان بێدار بۆ

مشێو مەست زەوق بـــادەى مەی خار بۆ.

تا تەوانام بی : تا توانام بوو.

نۆشاى جام : نۆشینى جام.

وێت واتەن : خۆت وتووتە.

مشێو : دەشێ ، دەبێ.

حەزرەتى مەولەوى لەم چوارینەیەدا روو دەکاتە ئاستانەى خواى گەورە و بە پاڕانەوە و بەوپەڕى خشوعەوە پێی دەڵێ : تا جوان بووم و هێز و توانام تێدا بوو شەونخوونیم چێژت و خەریکى زیکر و فیکرى تۆ بووم بە خەیاڵى گەیشتن بە دیدارى زاتى پاکت کە ئەویش خۆى لە نۆشینى جامێک لە شەرابى یەکڕەنگى خودایی دەبینێتەوە و بۆ نۆشینى ئەو جامەش پەلەم بوو و قەرارم لێ بڕا ، ئەى خواى گەورە خۆت فەرمووتە هەرکەسێک بە زیکر و فیکرى منەوە شەوان بێدار بێ و شەونخوونى بچێژێ ئەوا پاداشتى دەدەمەوە بەوەى لە بادەى یەکڕەنگى وەحدەت دا سەرخۆشى دەکەم و بەوەش دەگاتە دیدارم و لە کۆت و بەندى ئەم دنیا فانییە رزگارى دەبێت و بەرەو بەقا دەڕوات (بەقاى پاش فەنا).

ئەم لێکدانەوەیە بە پێی بنەما عیرفانییەکانە ، واتە لێکدانەوەیەکى عیرفانیە ، لە ئەدەبی عیرفانى دا شەراب و مەى و بادە و ساقى و مەستى و سەرخۆشى ... تاد ماناى تر دەبەخشن دوور لە مانا زاهرییەکەیان ، ئەگەر بەم شێوە عیرفانییە ئەم چوارینەیە لێکبدەینەوە ئەوا بە روونى دیارە کە حەزرەتى مەولەوى شاعیرێکى عیرفانى بووە و لە عیرفان دا گەیشتۆتە ئەو مەقامە کە راستەوخۆ و بێ پەنابردنە بەر پیرەکەى روو لە دەرگاى خواى گەورە بکات و داواى پاداشت بکات کە ئەمەش لە تەصەوف و عیرفان دا پلەیەکى بەرزە و دواى بڕینى چەندین قۆناغ ئەوجا پێی دەگەیت ، ئەگەر بەم لێکدانەوەیەش رازى نەبین ، ئەوا دەبێ ئەو چوارینەیە وەکو هەیە لێکى بدەینەوە و ئەو سەرخۆشى و بادەیە بە بادەى نێو مەیخانەکان لە قەڵەم بدەین و حەزرەتى مەولەویش بە کەسێکى سەرخۆشى بێهۆش دابنێین کە ئەمەش دوورە لە ئاکار و ئەخلاقى حەزرەتى مەولەوییەوە ، هەموومان دەزانین کە حەزرەتى مەولەوى زانایەکى ئایینى بووە و چەندین دانراوى شیعریی ئایینى هەیە.

بۆیە بەندە پێم وایە تەنیا ئەم چوارینەیە بەسە بۆ سەلماندنى ئەوەى کە حەزرەتى مەولەوى شاعیرێکى عیرفانى بووە و شایەنى ئەوەیە هاوشێوەى خواجە حافزى شیرازى لێکدانەوەیەکى عیرفانییانەى سەرتاسەرى بۆ تەواوى شیعرەکانى بکەین لە دوو تۆى چەندین بەرگە کتێب دا.

ده‌نگێ نه‌دراوه

.:: نوێ‌ترین ::.

ساتێک لەخزمه‌ت مامۆستا ناسری سوبحانیدا ئه‌هلی سوننه‌تی ئیران (1399/03/14)
ساتێک لە خزمەت دکتۆر خۆڕڕەم‌دڵ ئه‌هلی سوننه‌تی ئیران (1399/03/09)
ڕه‌وشتبه‌رزێكی زانا روابط عمومی، ئه‌هلی سوننه‌تی ئیران (1399/03/05)
شه‌وبێداری رمضان، ئه‌ده‌ب و هونه‌ر (1399/03/01)
غرووبت بۆ من سروورە ئەی ماهی نوور رمضان، ئه‌ده‌ب و هونه‌ر (1399/02/31)