به‌یانیه‌ی جه‌ماعه‌تی ده‌عوه‌ت و ئیسلاحی ئێران سه‌باره‌ت به‌ كوده‌تای ئه‌رته‌ش له‌ میسر

به‌یانیه‌ی جه‌ماعه‌تی ده‌عوه‌ت و ئیسلاحی ئێران سه‌باره‌ت به‌ كوده‌تای ئه‌رته‌ش له‌ میسر

دوای تێپه‌ڕینی یه‌ك ساڵ له‌ گرتنه‌ده‌ستی هێز له‌ لایه‌ن یه‌كه‌م سه‌رۆك كۆماری هه‌ڵبژارده‌ی خه‌ڵكی میسر كه‌ له‌ڕێگه‌ی هه‌ڵبژاردن و سندووقی ده‌نگه‌كانه‌وه‌ هه‌ڵبژێردرابوو، به‌ ئه‌نجامی كوده‌تایه‌ك له‌لایه‌ن ئه‌رته‌شه‌وه‌ هه‌لومه‌رجی سیاسی میسر تووشی ڕاوه‌ستان بوو و یاسای گشتی په‌سه‌ندكراوی زۆرینه‌ی خه‌ڵك، وه‌لا نرا. ئه‌م ڕووداوه‌، هیوا به‌ ئاڵوگۆڕى ئه‌رێنی له‌ گرینگترین وڵاتی عه‌ربی‌دا كه‌ ده‌یتوانی به‌دوای خۆیدا جیهانی عه‌ره‌بیش بگۆڕێ‌، كاڵ و كه‌مڕه‌نگ كرده‌وه‌. له‌م باره‌وه‌ چه‌ن خاڵێک جێی سه‌رنجه‌ : 1ـ به‌كارهێنانی هێز بۆ ئاڵوگۆڕ و به‌رانبه‌ری هێزه‌کانی ده‌سه‌ڵات و وه‌لانانی ئیراده‌ی خه‌ڵكی له‌ دنیای ئه‌مڕۆدا به‌ هیچ جۆر په‌سند نییه‌ و ئه‌م كوده‌تایه‌ له‌لایه‌ن هه‌موو مرۆڤێكی ئازادیخواز و خاوه‌ن‌ژیار، ئیدانه‌ ده‌كرێ‌. 2ـ كوده‌تاچیه‌كان له‌ یه‌كه‌م به‌یانیه‌ی خۆیاندا ڕایانگه‌یاند كه‌ پابه‌ندن به‌ مافی هاووڵاتی وه‌ك: ئازادی به‌یان، ئازادی ڕاده‌ربڕین و كۆبوونه‌وه‌، پشتگیری نه‌كردن له‌ لایه‌نێكی سیاسی دژ به‌ لایه‌نه‌كانی دیكه‌ و ... . به‌ڵام هه‌ر له‌ سه‌ره‌تای كوده‌تاكه‌وه‌ به‌ قۆلبه‌ست كردنی زۆرێ‌ له‌ به‌رپرسانی حیزبی ئازادی و عه‌داله‌ت و بزووتنه‌وه‌ی اخوان المسلمین و به‌ستنی قه‌ناتی ئاسمانیی و ڕۆژنامه‌كانی حیزبی حاكم، له‌به‌ر چاو هه‌موو خه‌ڵكی جیهاندا وه‌عد و به‌ڵێنیه‌كانی خۆیان وه‌لانا و به‌كوشتنی دڕدندانه‌ی نوێژخوێنان له‌ كاتی نوێژی به‌یانیدا كه‌ تا ئێستا ئه‌ژماریان گه‌یشتووه‌ته‌ 80 كه‌س، زوڵم و زۆری خۆیانیان گه‌یاندووه‌ته‌ باڵاترین ئاست. 3ـ هه‌موومان له‌بیرمانه‌ كه‌ دكتۆر موحه‌ممه‌د مۆرسی، سه‌رۆك كۆماری هه‌ڵبژارده‌ی خه‌ڵكی میسر، له‌ هه‌ل و مه‌رجێكدا ئیشی ده‌س پێکرد كه‌ به‌شێكی زۆر له‌ مافه‌ ڕه‌وا و یاساییه‌كانی له‌ به‌یانییه‌ی موته‌ممی (ته‌واوکه‌ر) ئه‌رته‌شدا لێی ستێنرابۆه‌ و ده‌بوو به‌ته‌نها خۆی و له‌گه‌ڵ بوونی گرفتی زۆر، ڕابه‌رایه‌تی ئه‌م قۆناغه‌ دژواره‌ له‌ مێژووی میسر به‌ ئه‌ستۆ بگرێ. نه‌بوونی كه‌لتووری دژایه‌تی كردن به‌ شێوازی دێمۆكراتیك له‌لایه‌ن دژبه‌ره‌كانیه‌وه‌ و نافه‌رمانیكردنی زۆر ـ كه‌ به‌ ڕاشكاوی بۆ له‌ناوبردنی سه‌رۆك كۆمار و پڕۆژه‌ی ناكارامه‌كردن و «افشال» بووـ له‌ په‌نای بارودۆخی پڕ له‌ كه‌لێنی ئابووری میسر بووه‌ هۆی ئاڵۆزكردنی ده‌سه‌ڵات و هه‌مووی ئه‌مانه‌ ده‌سی دا به‌ ده‌ست یه‌كه‌وه‌ تا ده‌وڵه‌ت نه‌توانێ‌ به‌سه‌ر ئه‌و گرفتانه‌ی كه‌ سه‌رچاوه‌که‌ی ده‌گه‌رایه‌وه‌ بۆ ده‌سه‌ڵاته‌کانی پێشوو، سه‌ركه‌وتوو بێت. 4ـ ده‌ستێوه‌ردانی ڕاسته‌وخۆ و ڕاشكاوانه‌ی ماڵی و سیاسی وڵاته‌ ده‌وڵه‌مه‌نده‌ عه‌ره‌به‌كان و ئیزن پێدانیان له‌لایه‌ن رۆژئاواوه‌، هیچ جێگایه‌ك بۆ گومان له‌ هاوپه‌یمانیی بانگخوازانی مه‌ده‌نیه‌ت و دێمۆكراسی له‌گه‌ڵ سه‌رانی دواكه‌وتووی هه‌ندێ‌ له‌ وڵاتانی ناوچه‌كه‌، ناهێڵێ‌ و ئه‌و قسه‌‌ش كه‌ ده‌یانگوت ئیخوانیه‌كان هاوپه‌یمانی ئه‌مریكان، به‌تاڵ و پووچ ده‌كاته‌وه. 5ـ له‌گه‌ڵ بوونی هه‌ندێ‌ هه‌ڵه‌ و نه‌زانكاری كه‌ له‌ دوایین به‌یانیه‌ی دكتۆر موحه‌ممه‌د مۆرسی دا ئاماژه‌ی پێكرابوو، یه‌كێ‌ له‌ گه‌وره‌ترین خاڵی ده‌سه‌ڵاتداری ئیسلامییه‌كان له‌ماوه‌ی ئه‌م یه‌كساڵه‌دا، وه‌لانه‌خستن و لانه‌بردنی دژبه‌ره‌كانیان، ڕیزگرتن له‌ ئازادی ئه‌وان له‌ به‌شی میدیایی و كۆبوونه‌وه‌ و هه‌روه‌ها به‌كاری هێنانی كه‌سانێك له‌ پۆسته‌ سه‌ره‌كیه‌كان كه‌ سه‌ر به‌ ئیخوان نه‌بوون، كه‌ ئه‌م ئیدديعایه‌ له‌ لایه‌ن زۆرێك له‌ چاودێرانی به‌ ئینساف وه‌ك موحه‌ممه‌د حوسێن هه‌یكه‌ل، ڕۆژنامه‌نووسی میسری په‌سه‌ند و جه‌ختی له‌سه‌ر كراوه‌. ئاستی ئازادی له‌ میدیاكاندا ئه‌وه‌نده‌ بوو كه‌ چه‌ن جار سه‌رۆك كۆمار و سه‌رانی حیزبه‌ ئیسلامییه‌كان تووشی سه‌ختترین و ناپه‌سه‌ندترین تانه‌ و توانجه‌كان بووه‌نه‌وه‌. ئه‌مه‌ له‌ حاڵێكدایه‌ كه‌ شكاتی دژ به‌ سه‌رۆك كۆمار له‌ لایه‌ن كوده‌تاچییه‌كانه‌وه‌ به‌ تاوانی بێڕێزی كردن به‌ ده‌زگای قه‌زا كراوه‌ته‌وه. 6ـ ئه‌زموونی كوده‌تا و سه‌ركوت كردن له‌ مێژووی هاوچه‌رخدا نیشانده‌ری ئه‌وه‌یه‌ كه‌ ئه‌م ڕووداوانه‌ هه‌رچه‌ن تاڵ و بێ قازانجه‌، به‌ڵام ناتوانێ‌ بۆ هه‌میشه‌ به‌رده‌وام بێت و له‌ ئه‌نجام دا ئیراده‌ و خواستي میلله‌ته‌كان و ڕاوه‌ستاوی خه‌ڵكه‌ كه‌، به‌تاڵ و شوێنكه‌وتوانی وه‌لا ده‌نێ‌ : (...كَذَٰلِكَ يَضْرِبُ اللَّـهُ الْحَقَّ وَالْبَاطِلَ فَأَمَّا الزَّبَدُ فَيَذْهَبُ جُفَاءً وَأَمَّا مَا يَنفَعُ النَّاسَ فَيَمْكُثُ فِي الْأَرْضِ كَذَٰلِكَ يَضْرِبُ اللَّـهُ الْأَمْثَالَ)[رعد:17] جه‌ماعه‌تی ده‌عوه‌ت و ئیسلاحی ئێران 19ی پووشپه‌ڕی 1392ی ھه‌تاوی

.:: نوێ‌ترین ::.

ڕاڤه‌ی شیعره‌ فارسییه‌كانی مه‌حوی ئه‌ده‌ب و هونه‌ر (1398/05/15)
کۆچی دوایی قارەمانێک هه‌واڵه‌کانی ئیسلاح وێب (1398/03/31)
کۆچی دوایی حاجی مامۆستا مەلا عومەر حوسینی ئایچی هه‌واڵه‌کانی ئیسلاح وێب (1398/03/31)