نامه‌ی كچه‌ شه‌هیدێك بۆ دایكی نه‌جیبه‌خانی كچی مامۆستا (ناسری سوبحانی) نامه‌ بۆ دایكی ده‌نووسێ‌

کۆکه‌ره‌وه‌: 
مودریك عه‌لی عارف
نامه‌ی كچه‌ شه‌هیدێك بۆ دایكی نه‌جیبه‌خانی كچی مامۆستا (ناسری سوبحانی) نامه‌ بۆ دایكی ده‌نووسێ‌

دایك بوون.. دایك بوون یانی خۆی به‌ ته‌نها ده‌توانێ‌ هه‌م دایك بێت و هه‌م باوك. دایك بوون واته‌: ئه‌گه‌ر بتوانی له‌گه‌ڵ هه‌موو دونیادا درۆ بكه‌ی، ناتوانی له‌گه‌ڵ ئه‌ودا درۆ بكه‌ی. دایك بوون یانی: ئه‌گه‌ر له‌م ڕۆژه‌دا (ڕۆژی دایك) بته‌وێ‌ دیاری پێ‌ ببه‌خشیت، پێتده‌ڵێ‌: تۆ ژیربه‌.. تۆ ده‌رس و وانه‌كانت بخوێنه‌.. من دیاریم ناوێت.. ئه‌مه‌ بۆ من له‌ هه‌موو دیارییه‌ك به‌نرختره‌. دایك بوون واته‌: هیچ كاتێك درۆ ناكات، بۆ ئه‌وه‌ی تۆ فێری درۆكردن نه‌بیت. دایك بوون یانی: كاتێك كه‌ خواردنه‌كه‌ كه‌م ده‌بێت، ئه‌وه‌ی كه‌ برسی نییه‌ ئه‌وه‌. دایك بوون واته‌: له‌ ناو نوێژه‌كه‌ی به‌یانیدا به‌ ده‌نگی به‌رز دوعا و نزا بۆ مناڵه‌كانی بكات. دایك بوون یانی: پاشماوه‌ی خواردنه‌كه‌ بڕژێنێته‌ ناو باخچه‌كه‌ بۆ چۆله‌كه‌كان. دایك بوون واته‌: ئه‌گه‌ر تا حه‌وشه‌كه‌ی ماڵه‌وه‌تان بچی، ته‌له‌فۆنت بۆ ده‌كات و ده‌ڵێ‌: گه‌شتوویت؟! دایك بوون یانی: هیچ كاتێك نائومێد نه‌بێ‌، بۆ ئه‌وه‌ی مناڵه‌كانی هه‌میشه‌ به‌ كه‌یف و خۆشحاڵ بن و بیرۆكه‌ و خرۆشی زه‌ینیان هه‌بێ‌. دایك بوون واته‌: ئه‌و چركه‌ساته‌ی كه‌ له‌ ئامێزی ده‌گری، به‌ هه‌موو دونیا ده‌ژی. دایك بوون یانی: هه‌میشه‌ بڵێ‌: خه‌ڵكی مناڵی هه‌یه‌ و منیش مناڵم هه‌یه‌. دایك بوون واته‌: ئه‌گه‌ر به‌یانی دره‌نگ له‌ خه‌و هه‌ستیت، پێتبڵێ‌: هاوڕێكانی تۆ پێنج مناڵیان هه‌یه‌ و ئێسته‌ له‌ ماڵی خۆیاندان، تۆش هه‌ر خه‌ریكبه‌ بخه‌وه‌. دایك بوون یانی: هیچ كاتێك ناهێڵێ‌ تۆ هه‌ست به‌وه‌ بكه‌یت كه‌ باوكت نییه‌. دایك بوون واته‌: هه‌موو (قه‌یسی)یه‌كانی ناو حه‌وشه‌كه‌ بنێرَی بۆ (سنندج ـ سنه‌) بۆ دوو كچه‌كه‌ی و بڵێ‌: ئه‌وان له‌ شاری غه‌ریبن. (بۆ منیش په‌شمه‌كی زه‌عفه‌رانی بنێرێ‌.) دایك بوون یانی: خه‌ریكه‌ نان و خواردن ده‌خوا و به‌ یادی مناڵه‌كانیه‌وه‌ ـ كه‌ له‌لای نین ـ سه‌د جار بڵێ‌: له‌ گه‌رووم ناچێته‌ خواره‌وه‌. دایك بوون واته‌: له‌ پشته‌وه‌ ده‌ستی (حه‌زره‌تی ئه‌ییوب)ی به‌ستووه‌، به‌هۆی سه‌بر و ئارامگرییه‌كه‌وه‌ كه‌ هه‌یه‌تی!! دایك بوون یانی: ئه‌گه‌ر كچه‌كه‌ی له‌ (تاران)ه‌وه‌ ته‌له‌فۆنی بۆ بكات و بڵێ‌: (دایكه‌ خواردن چیتان هه‌یه‌؟ ئه‌ویش بڵێ‌: ئه‌مشه‌و برسیمان نه‌بوو.. خواردنم دروست نه‌كرد!) بۆ ئه‌وه‌ی كچه‌كه‌ی تاسه‌ی ئه‌و خواردنه‌ نه‌كات. دایك بوون واته‌: زۆر شتی دیكه‌، ئه‌گه‌ر ده‌ هه‌زار به‌رگ كتێب له‌باره‌ی دایكه‌كانه‌وه‌ بنووسرێ‌ هێشتا كه‌مه‌، به‌ بۆچوونی من، خوا جوانترین و باشترین ڕۆڵی به‌ دایك به‌خشیوه‌.. كه‌سانێك كه‌ عاشقانه‌ مناڵه‌كانیان خۆشده‌وێ‌.. ڕاستگۆیانه‌ مناڵه‌كانیان خۆشده‌وێ‌. دایكه‌گیان! عاشقتم.. نه‌ك ته‌نها ئه‌مڕۆ (كه‌ ڕۆژی دایكه‌) به‌ڵكو هه‌موو چركه‌كان.. هه‌موو ساته‌كان.. خوله‌كه‌كان.. ڕۆژه‌كان.. ساڵه‌كان هی تۆن و ئه‌م ڕۆژه‌ ته‌نها بیانوویه‌كه‌. ئه‌و چركه‌ساته‌ی كه‌ له‌ ئامێزتم ده‌گریت و ماچم ده‌كه‌یت، نایگۆڕمه‌وه‌ به‌ هه‌موو خۆشییه‌كانی دونیا، وه‌ك دێوانه‌یه‌ك خۆشم ده‌وێیت، ئه‌گه‌ر له‌ پاش خوا بمه‌وێ‌ كه‌سێك بپه‌رستم، گومانت نه‌بێ‌ كه‌ خودی تۆ ده‌په‌رستم، كه‌ سومبول و نیشانه‌ی میهره‌بانی خوای له‌ سه‌ر زه‌ویدا. له‌ تۆوه‌ ته‌نها فێری چاكه‌ بووم، له‌ تۆوه‌ فێر بووم كه‌ عاشقی مرۆڤه‌كان و سروشت و گیانداره‌كان بم، تۆ فێرت كردم كه‌ عاشق بم، دێوانه‌تم به‌ خوا... ئه‌گه‌ر تۆ نه‌بیت منیش نیم. درۆ نه‌كردن.. تۆمه‌ت نه‌دان.. گاڵته‌ نه‌كردن.. سوكایه‌تی نه‌كردن.. له‌ خه‌می ئه‌وانی دیكه‌دا بوون.. هاوكاری كردن.. عاشق بوون.. به‌هیوا بوون.. باش و دروست قسه‌كردن.. بیركردنه‌وه‌.. كتێب خوێندنه‌وه‌ و هه‌زاران هه‌زار شت و بابه‌تی دیكه‌، ئه‌مانه‌ ئه‌و شتانه‌ن كه‌ تۆ فێرت كردووم.. دایكه‌! یانی عاشقتم.. بۆت ده‌مرم.. خاكی ژێر پێت ماچ ده‌كه‌م.. هه‌موو دونیا له‌لایه‌ك و تۆش له‌ لایه‌ك. حوسێنی په‌ناهی ده‌ڵێ‌: به‌هه‌شتێك كه‌ دایكمی تێدا نه‌بێ‌، نامه‌وێت. *** تێبینی: ئه‌م نامه‌یه‌ خاتوو (نه‌جیبه‌)ی كچه‌ بچوكه‌كه‌ی مامۆستا (ناسری سوبحانی) به‌ بۆنه‌ی (ڕۆژی دایك)ه‌وه‌ به‌ فارسی بۆ خاتوو (جه‌یران)ی دایكی نووسیویه‌تی، (نه‌سیره‌) خانی خوشكی له‌ په‌یجی تایبه‌تی خۆی له‌ تۆڕی كۆمه‌ڵایه‌تی فه‌یس بووك دایبه‌زاندبوو، به‌نده‌ش به‌ سوپاسه‌وه‌ له‌به‌ر گرنگی ناوه‌ڕۆكه‌كه‌ی و جوانی و ناسكی و به‌رائه‌تی هه‌سته‌كه‌یان، به‌ پێویستم زانی وه‌ریگێڕمه‌ سه‌ر زمانی كوردی.

ده‌نگێ نه‌دراوه

بۆچوونەکان

1
هیوا (not verified)
1392/2/2 05:05

بژیت به ریزم یادی شه هیدی پیشه واش به خه یر.

2
مودريك عةلى عارف (not verified)
1392/2/5 09:15

زۆر سوپاس به‌ریز هیوا.. سوپاس بۆ ئه‌و به‌ریزانه‌ش بابه‌ته‌كه‌یان خویندووه‌ته‌وه‌

.:: نوێ‌ترین ::.

ڕاڤه‌ی شیعره‌ فارسییه‌كانی مه‌حوی ئه‌ده‌ب و هونه‌ر (1398/05/15)
کۆچی دوایی قارەمانێک هه‌واڵه‌کانی ئیسلاح وێب (1398/03/31)
کۆچی دوایی حاجی مامۆستا مەلا عومەر حوسینی ئایچی هه‌واڵه‌کانی ئیسلاح وێب (1398/03/31)
‍لە خودی خۆتەوە دەست پێ بکە... هه‌وارگه‌ی دڵان (1398/03/31)
کاری منداڵان و منداڵانی کار کۆمه‌ڵایه‌تی (1398/03/31)