حاجییەکان! کە چوونە بەیت، زەمزەم و نزاتان لەبیر بێت

حاجییەکان! کە چوونە بەیت، زەمزەم و نزاتان لەبیر بێت

"پێشکەشە بە هەموو ئەوانەى شەرەفى زیارەتى کەعبە و بەیت و ڕەوزەیان پێ دەبەخشرێ"

هەموو تامەزرۆیانى زیارەتى کەعبە و بەیت و شەیدایانى مەدینە و ڕەوزە، لەم وەرزى حەج و لەم ساتى تۆرانى دڵ لە دونیا و ئاشتبوونەوە لەگەڵ ئاسماندا، لەگەڵ حەزرەتى "بێخود"ى شاعیر و بە دڵێکى تامەزرۆیانەوە، سکاڵاى دڵ دەبەینە حزوورى حەزرەتى بارى و لە مەملەکەت و فەسڵى "زمانپژانى نزادا" دەڵێین:

لەو ڕۆژەوە ڕۆیشتووە تۆراوە دڵى من

هەر چەند ئەگەڕێم بێ سەر و شوێن ماوە دڵى من

ئاخۆ بە چ شاخێکەوە گیرساوە دڵى من

یاخۆ بە چ داخێکەوە سوتاوە دڵى من...

مەعلوم چووە بۆ خزمەتى سالارى مەدینە

وامزانى کە فەوتاوە، نەفەوتاوە دڵى من.

ئەرێ حاجییە تاجدارەکان! ئێوە دەزانن و بیستووتانە کە بۆچى لە هەموو لایەکەوە خەڵکى ڕوو لەو بەیت و ڕووگەیە دەنێن و [ێڕْتُوکَ ڕجالاً ۆعَلى کُلِ چامِرٍ ێڕْتِینَ مِنْ کُلِ فَجٍ عَمِیقٍ.]؟

ئەرێ ئازیزە ڕێزلێگیراوەکان! قەت لە خۆتان پرسیوە کە بۆچى وا بەو شێوەیە و بە هەڵەداون و بە حەز و تامەزرۆییەوە بەرەو مەملەکەتى حیجاز و "مەهبەتى وەحى" و مەملەکەتى یارانى ئەنسار و موهاجیر و مەدینە و ڕەوزەى موننەووەرە کەوتوونەتە ڕێ؟

دۆستە خواپەرستە ڕێبوارە بێ قەرارەکان! قەت لە خۆتان پرسیوە کە بۆچى بە شەوقەوە ماڵ و مناڵتان بەجێهێشتووە و شانازی بە بەجێهێشتنیانەوە دەکەن؟

شەرەفمەندە خەڵاتکراوەکان! قەت لە خۆتان پرسیوە کە بۆچى خۆتان لە هەرچى شتى دونیایە داڕنیوە؟ بۆچى بە خۆتان و چەند مەترێ قوماشى سپى و بێ پەڵەوە، عاشقانە خۆتان لە دەرودیوارى بەیت و "حجرالاسود" هەڵدەسوون؟ ئەرێ بۆ وا بە فرمێسکى شەوقى تائیبانە و عابیدانەوە، بە ڕووت و ڕەجاڵى و زەلیلى خۆتان و داوا بچوکەکانتانەوە "بە پەیژەى نزا و تکا و پاڕانەوەدا" لە نێو کڕنوش و سوجدە و لە سەر بەرماڵى ماڵێکى ئاوەدان و لە سوجدەگادا و لەگەڵ قافڵەى "نزاگۆیان"دا بۆ لاى خواى گەورە و دەوڵەمەند و بەخشندە عروج دەکەن و سات لە دواى سات بەرز دەبنەوە؟

دڵ و ڕۆح و بەرگ سپییەکان! ئەرێ خۆشتان ئەزانن بۆ ئاوا عەوداڵانە بەو ڕۆح و گیانەوە کەوتوونەتە ڕێ؟ من بزانم بۆ ئەوەى لەو سەرەوە بە دەفتەرى پاک و بێ لەکە و دڵى سپى و وەک مناڵى تازە لەدایکبوو بگەڕێنەوە ناو ماڵ و مناڵ و زێد و نیشتیمان، ئەرێ توخوا وانییە؟

حاجییەکان! ئەزانن بۆ هێندە پەلەتانە بۆ گەیشتن بەو کەعبە و بەیتى "رب البیت"ە و شارە شیرینەکەى ئازیز و مەحبوبەکەى خوا؟ چونکە ئەوێ مەقام و جێ دەستى ئیبراهیمى خەلیل و ئیسماعیلى زەبیحى لێییە، چونکە ئەوێندەرێ هێشتا جێ پەنجەى ئیبراهیم و ئیسماعیل بە گڵ و بەردەکانەى بەیتەوە دیارە، خاک و دار و بەردى ئەوێ بۆنى عارەقى نێو چاوى ئیبراهیمى سەر و ڕدێن سپى و ئیسماعیلى لاوى دڵ سپى دەدات، ئەى ئەوە نییە جێ پێى ئیبراهیمى بابە گەورەمان لە "مەقام"دا ماوە و زیارەت دەکرێ و، لەوێ بە قیام و قامەتێکى موحەممەدیانە دەبێ نوێژى بەردەم مەقام بەرپا بکرێ؟ ئەوە نییە ئەو خاکەى مەککە و "بەککەى موبارەکە" کە بەیتى لێیە و بە فرمێسکەکانى هاجەرە خاتوون و ئیسماعیلى زەبیح تەڕ بووە، هێشتا فرمێسکەکان وەک ئاونگ و دانەى یاقوت بەسەر گڵەکەوە چاوەڕێى گەڕانەوەى بابە ئیبراهیم دەکەن و وشک نەبوونەتەوە؟ دەبینن کسپەى سۆز و عەتفى هاجەرە خاتوون بەسەر تەپۆڵکەکانى سەفا و مەروەوە بەجێ ماوە و قەیتانى نەعلەکانى لە دڕک و چڵ و چێوەکانى ئەو بیابانە ئاڵاوە؟ دەبینن کە خوێنى ژێر پێى شەقاربردووى ئەو دایکە بە سۆزە تکاوەتە سەر دانە بە دانەى بەردەکانى سەفا و مەروە؟ ئەى دەبینن کە لە ژێر پێ تۆزاوییەکانى ئیسماعیلیشدا کانى زەمزەم هەڵدەقوڵێ و ئاوى حەیات و تروسکایى ئومێد دێتە دەرێ.

حاجییە ئازیزەکان! ئەرێ ئێوە نابینن کە هێشتا لەوێ بۆنى جەستەى ئارەقاوى میسک ئاساى حەزرەت ئەو مەملەکەتەى تەنیوە و خەڵکى مەست و مەدهۆش کردووە؟ ئەى چاوتان لێیە کە سەروەرى خۆشەویستى دڵ، لە سەر بەردێکى "بەدر"دا پێغەمبەرانە وەستاوە و دەستەکانى بەرز کردووەتەوە و نزا دەکات و عەباکەى سەرشانى دەکەوێتە خوارەوە و یارە ڕاستگۆکەى دەیخاتەوە سەر شانى موبارەکى؟ ئەى توخوا هێشتا دەنگە زوڵاڵ و بەرزەکەى بانگە ئارامبەخشەکەى بیلال لەو کوچە و کۆڵانانەدا نازرینگێتەوە؟ گوێتان لێیە کە سەروەرى نازدار بانگ دەکاتە بیلال و پێى دەفەرمووێ: بیلال بڕۆ بانگ بدە با تاوێک پشوو بدەین و بحەوێینەوە "ڕرحنا بها یا بلال"؟

حاجییە تاجدارەکان! لەگەڵ ئەوەى کە من هێشتا شەرەفى حەج و زیارەتى بەیت و ڕەوزەم پێ نەبەخشراوە، ئەوەتانێ من لێرەوە بەم گوێ کاس و کەڕانەوەمەوە، گوێم لەو دەنگ و ئاوازەیە کە عەبدوڵڵاى کوڕى مەسعود و زوبێرى کوڕى عەوام لەسەر سەکۆى "ئەهلى سوففە" بە دەنگێکى خۆشەوە قورئان بۆ سەروەر و یاران دەخوێننەوە، ئا..ئا..بەڕاست من ـ بەم گوێ کزیەمەوە ـ ئێستاش گوێم لە نەرمە گریانەکانى شەوانى پڕ لە شەونوێژى ئەو سەروەرەیە و دەنگى ئایەتەکانى سورەتى "هود" و ئایەتى [فَکَیْفَ إِژَا جِئْنَا مِنْ کُلِ ڕُمَەٍ بِشَهِیدٍ ۆجِئْنَا بِکَ عَڵى هَۆُڵاءِ شَهِیدًا]الڕنساء (41). دێنە بەر گوێم و ڕام دەچڵەکێنن و تووشى شۆک و مەدهۆشى و حەیرانیم دەکەن، گوێم لەو سورەت و ئایەتانەیە کە سەرى بەرزى ئەو نازدارەیان پیر کرد"شَیَبَتْنِى هُودْ ۆڕَخَواتها" خۆ ئەگەر منیش تۆزقاڵێک لەو شعورە لە ناخمدا بووایە، دەبوو نەک هەر پیر ببوومایە بەڵکو لە هۆش خۆ بچوومایە و موسا ئاسا [وخر موسى ێعقا.] ببووایاتە پیشەى منیش.

حاجییە خەڵاتراوەکان! ئەرێ توخوا گوێتان لە دڵنەواییەکانى دایە خەدیجەگیان نییە کە چۆن دڵنەوایى سەروەر دەکات و دڵنیاى دەکاتەوە لە چاکى و پاکى و ڕاستى خۆیى و پەیامەکەى؟ ئەى گریان و هەنسک و لاواندنەوەکانى فاتیمەى تاقانە کچ و یادگارەکەى دایە خەدیجە و هاوڕێ نازدارەکەى ڕەسول نابیستن؟ ئەرێ توخوا بۆنى سوتانى گۆشت و چەورى و بەزى سەر و پشت و سەرشانى خەباب هەست پێناکەن و گوێتان لە قرچەى ئەو ئاسنە گەرمە نییە کە دەیخەنە سەرى؟ ئەى بیلال نابینن کە لە ژێر قامچى و توانج وسوکایەتى ئومەییەى سەر زلدا سرود و نرکەى "احد احد"ى دونیاى هەژاندووە و گیانى ئومەییەکانى تەزاندووە؟ دەتوخوا ڕاچڵەکێن و بە ئاگا بێنەوە و کەمێک چاو و گوێ بکەنەوە و دڵتان بە ئاگا بێننەوە، کەمێک گوێ ڕادێرن بزانن ئەوە دەنگى ئاهو نزولەى سومەییە و عەممار و یاسر نییە کە لە ژێر قامچى سەر زلەکاندا هانایان بۆ خوا بەرز دەکەنەوە؟

حاجییە ناجییەکان! ئەى گوێتان لە دەنگ و تەقەى دینار و درهەمەکانى ئەبوبەکرى یارى بێ قەرارى غار نییە کە دەیانژمێرێ بۆ ئومەییە و سەر زلەکانى قوڕەیش بۆ ئازاد کردنى بیلال و ئەوانیتر؟ ئەها من لەم شەوە جەنجاڵانەى ئێستە و لەم هەورامان و شارەزوورە دوورەوە، بە هێواشى گوێم لە جیڕەى دەرگا تەختەکەى ماڵى ئەڕقەمى کوڕى ئەڕقەمە کە سەروەر و یاران بە حەزەرەوە دەچنە ژوورێ؟ ئەوەتانێ هات، تەماشا کەن ئەوە یارى بە غیرەت و بە هەیبەتە، بەڵێ عومەرە و هاوار دەکات و بانگى ئاشکرا دەچڕێ و کەس ناوێرێ نوزەى لێوەبێت، تەنانەت ئومەییە و ئەبوجەهل و ئەبوسوفیانیش. 

حاجییە خواپەرستە خواویستەکان! ئەگەر بەسەردانى مەککە و زیارەتى بەیت دڵتان زیندوو بوویەوە و ڕۆحى پەژموردە و سیس بووتان بووژایەوە، ئەگەر زیارەتى مەککە و بەقیع و تەوافى بەیتتان تەواو کرد، ئەگەر یەک بە یەکى ئەو کۆڵانە بۆن گوڵاوییانە گەڕان و تاڵە مووەکانى سەر و ڕیشى موبارەکى حەزرەت و بارە وشترەکانى عوسمان و دینار و درهەمەکانى عەبدول ڕەحمانى کوڕى عەوف و شمشێرە دوو سەرەکەى حەزرەتى عەلى و نەعلە بەجێ ماوەکانى سومەییە و زەنیرەتان دۆزیەوە، ئەوا تامەزرۆیانە و حاجییانە و ناجییانە بەرەو مەدینە و ڕەوزەى موننەووەرە بکەونە ڕێ، بەڵام توخوا نەکا بە جادە و بە ناو دەریا و بە ئاسماندا بڕۆن، نا نا.. بەڵکو وەکو "نالى" کوردى دوورى شارزوور، بە تولەڕێ و بە کەنار دەریا و بە سەر چیادا هەڵزنن، ئەگەر کۆڵى گوناهیشتان قورس و سەنگین بێ شەرم مەکەن وترستان نەبێ، چونکە لەوێ "بە سەگ نابێ مولەووەس ئاوى زەرقا، بەحرى ئیحسانە"

ئا..ئا..کە گەیشتنە ئەوێ لە ناو ئەشکەوتى "سەور"یشدا کەمێک خۆتان حەشار بدەن، بڵێن بە "عەبدوڵڵاى کوڕى ئەریقت" با بە ڕانە مەڕەکەى جێ پێکانتان بسڕێتەوە نەکا ئاشکرا ببن و بتاندۆزنەوە، بە ئەسماى کچى یار و "زاتول نتاقەین"یش بڵێن با بە دزیەوە و بە ئەسپایى جار جارە یەک دوو نانێکى جۆ و دوو سێ دانە خورماى وشکتان بۆ بهێنێ نەکا برسیەتى بڕستتان ببڕێ، ئاخر ئەسما هێشتا ـ بە شەرم و هەیبەت و عیززەتەوە ـ هەر لەو ڕێیەدا دێت و دەڕوات و عەبدوڵڵاش هەر خەریکى لەوەڕاندنى ڕانەکەیەتى.

خێراکەن خۆتان حەشار بدەن، بچنە پەنا ئەو بەردەوە، ئەها سوارچاکێک لە دوورەوە دیارە و بە هەڵەداوان بەرەو ڕووتان دێ، ئا..خۆیەتى، ئەوە سوراقەیە و بە دواى نێچیرێکەوەیە کە ماڵێکى بەلاش و خەڵاتێکى گرانبەها وەرگرێ، ئەوە چى بوو؟ بۆ دیار نەما؟ سوراقە و ئەسپەکەى کەوتنە چاڵەوە؟ نا نا..بەڵکو هەر چەندە کە سوراقە خۆى نازانێت و بە ئەندازەى ئەسپەکەى شعورى نییە، بەڵام ئەوەتانێ ئەسپەکەى بە شەرمەوە "سوجدەى سەهو" دەبات و پۆزش بۆ ئەو بێشەرمییەى خۆیى و خاوەنەکەى دێنێتەوە، چونکە دەزانێ بە هەڵە هاتووە و نەدەبوو بهاتبا...

بکەونە ڕێ و مەوەستن کات درەنگە، ئەوەتانێ جارێکى دیکەش دەنگە دەنگە، دەنگى ناڵى حوشتر و حیلکەى ئەسپ و زڕەى زنجیرى جەنگاوەران، ئەڵێى بۆ گرتنى شورا و سوپایەک هاتوون، قەیدى نییە بچنە ژوورەوە و بێدەنگ مات بکەن، ئا..ئا..بچنە ناو ئەشکەوتى "سەور" تا جاڵجاڵۆکە و کۆترە شینکە ببنە پاسەوانتان، باوەڕ ناکەن؟! دەتۆ سەیرکەن بزانن ئەو دوو بەستەزمانە ئەو هەموو سوپایە نابەزێنن و فریویان نادەن؟ خۆ بینیتان، ئەو گەمژانە چۆن کوێر بوون و سەرشۆڕانە خوار بوونەوە بۆ ناو ئەو چەم و دۆڵانە؟

ئیدى ئەمڕۆ بەسە، زۆر شەکەت و ماندوون ، ئەمشەو هەر لەم ماڵە قایمەى جاڵجاڵۆکە و کۆترە شینکەدا پشوویەک بدەن، تا دەمەوبەیان بچنە "قوبا" و دوو ڕکات نوێژى شوکر بخوێنن کە لەو هەموو دوژمنە نەزانە ڕزگارى کردن، لە پاش نوێژیش بەرەو "یەسریب" بکەونە ڕێ بۆ لاى یاران، ئاخر یارانى کۆچەرتان بەر لە ئێوە لەگەڵ ئەنسارەکان برایەنە ماڵیان بەشکردووە و بەشى ئێوەش زۆر دەمێکە چاوەڕێتانە.

حاجییەکان! لە بان ئەو تەپۆڵکەیەشەوە تەماشاکەن، ئەو تارماییە دەبینن؟ ئا ئەوە "یەسریب"ى شارى ئەوس و خەزرەجە، ئەوێ مەملەکەتى دەنگ و ڕەنگ و ئایینە جیاوازەکانە، ئەوێ دەیانەوێ لەگەڵ دەنگ و ڕەنگە جیاوازەکان بژین و تەبا بن، لەوەش زیاتر ئەوان دەیانەوێ بە دڵ و گیان ڕێز لە میوانەکەیان بگرن، پێشوازى لە ئایین و پەیامبەرە تازەکەیان بکەن، ئەوان دەیانەوێ ببنە سایەى حەوانەوە و "یەسریب" بکەنە شار و مەدینەى مونەووەرە، بۆ ئەوەى بە قدوم و تەشریفهێنانى مونەووەرى بکات، ئا..ئا..گوێ هەڵخەن ئەها لە تاو تامەزرۆیى دیدارى میوانى ئازیز و یارەکەیدا گەورە و مناڵ..ژن و پیاو..گەدا و هەژار، دێنە پێشوازى و بە هەلهەلە و بە شەوقەوە سرودى پڕ چێژى "گلع البدر علینا" دەڵێنەوە.

دەتوخوا ئێوەش ئەى حاجییەکان! تکاتان لێ دەکەین کە مەیەنەوە تا گوێتان لەو هەموو دەنگ و ئاوازانە دەبێت و ئەو هەموو دیمەنە جوان و سەرنجڕاکێش و ئەو تابلۆ و نیگارانە نەبینن، مەیەنەوە تا لە کەنار بەیت و لە پەناى کەعبە و لە دوادیدارى ناو ڕەوزەدا "تاجى حاجى" نەکرێتە سەرتان و لێبوردن و پابوونەوە لە گوناه نەکرێتە خەڵاتتان.

حاجییەکان! توخوا کە هاتنەوە بێجگە لە باسى دیمەن و یادگارەکانى ئەوێ و قومێک ئاوى زەمزەم هیچمان بۆ مەهێننەوە، ئێمە تەنها تام و بۆنى ئەوێمان دەوێ لێتان نەک دیارى و تەسبیح و سیواک و سەوقات، ئێمە بۆنى ڕۆحەکانى ئەوێمان لە ئێوە دەوێ، ئێمە تەنها دونیایەک دوعا و نزاى پەناى کەعبە و ڕەوزەمان دەوێت و بەس، توخوا هیچمان بۆ مەهێننەوە بێجگە لەم خەڵاتانە، نەک بە دیارى و سەوقاتى دونیایى دڵمان خۆش بکەن و فریوماندەن، ئێوە تەنها دوعا و نزاکان لەبیر مەکەن، نزا بۆ موحتاجەکان، نزا بۆ تامەزرۆکان، بەڵێ نزا بۆ برسیەکانى حەج و تینووەکانى زەمزەم، بەڵى کە هاتنەوە تەنها زەمزەم و نزا لەبیر مەکەن.

***

ده‌نگێ نه‌دراوه

بۆچوونەکان

1
فریده (not verified)
1391/8/2 08:07

سلاوی خوات لی بی برای بریز-زور جوانو ته واو بو - یاخوا دیسان نه سیبم بیت تا جوانتر انجام بدم.کاک علی سلاووریزم هیه بو خیزانت

999999

2
مودريك عةلى عارف (not verified)
1391/8/3 08:01

سلاوی خوا بیشكه‌شی جه‌نابتان بیت و خوای میهره‌بان حه‌جتان به‌ نسیب بكاته‌وه‌ و به‌ره‌كه‌تی ئه‌و مه‌مله‌كه‌تی وه‌حدانیه‌ته‌ بباریته‌ سه‌ر دل و رۆحتان" كه‌لیك مه‌منون بۆ جه‌نابتان و لوتفتان فه‌رموو" به‌نده‌ و هاوسه‌ریشم حورمه‌ت و ریز و سلاومان هه‌یه‌ بۆتان ...

.:: نوێ‌ترین ::.

ڕاڤه‌ی شیعره‌ فارسییه‌كانی مه‌حوی ئه‌ده‌ب و هونه‌ر (1398/05/15)
کۆچی دوایی قارەمانێک هه‌واڵه‌کانی ئیسلاح وێب (1398/03/31)
کۆچی دوایی حاجی مامۆستا مەلا عومەر حوسینی ئایچی هه‌واڵه‌کانی ئیسلاح وێب (1398/03/31)
‍لە خودی خۆتەوە دەست پێ بکە... هه‌وارگه‌ی دڵان (1398/03/31)
کاری منداڵان و منداڵانی کار کۆمه‌ڵایه‌تی (1398/03/31)