ئیمه‌ کێین

به ناوی خوا

سەر نامە بەناوی تۆ خودایە                      چی بێ ئەوە پیت و پێزی نایە

ناوت بوە شەو چرا لە بەرمان                     بۆ دەردی دەروون دەبێتە دەرمان

بی ناوی  تۆ نامە هیچ و پووچە                 نەت نوسێ بنوس كەچ وكروچە

خوێنەران ماڵپەڕی ئیسلاح وێب!

 سڵاوێكی گەرم و سۆزدارانە؛‌‌‌

له دونیای ئەمرۆدا،كۆمەڵگاكان به كۆمه‌ڵگای فره‌كلتووری ناسراون، بەشێوەیەك كە كەمتر كۆمەڵگایەك دەتوانی پەیدا بكەیت كە تەواوی ئەندامانی ئایین زا و زمان و كلتوور‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌یان هاوچشن بێت؛ كەواتە تاكاتێك كە شارومندانی كۆمەڵگایەك بەهۆی كۆسپ و تەگەرەی رامیاری و كۆمەڵایەتی و ئابورییەوە نەتوانن بەشێوەیەكی كارامە لەبڕیارداندا بەشداریان هەبێت، ناتوانن كۆمەڵگایەكی مرۆڤ دۆستانەی پێشكەوتوو دەسته‌بەر كەن. كه‌واتە لەوەها كۆمەڵگایەكدا بەردەوام لەلایەن زۆرینەی خاوەن دەسەڵات و دارای دەچەو سێندرێتەوە.

تاكاتێك كەبنەماڵەیەك لە كەم ترین كەرەسەكانی ژیان بێ بەهرە بێت یا تاكێك بەهۆی ئاوێتە بوون بە شوناسێكی كۆمەڵایەتی _ كلتووری تایبەت، نەتوانی رۆلی كۆمەڵایەتی شیاوی خۆی ببینێت، ناتوانی چاوەڕوانی گوڵ كردنی تواناییە ئینسانیەكان و هەروەها درووست بوونی كۆمەڵگایەكی یەكگرتوو بكەیت.

بۆ ئەوەی شووناسە جوراوجورە كۆمەڵایەتیه‌كان بتوانن لەپەنایەك بەشێوازێكی گونجاو بحەوێنەوە، دەبێت جۆری بەسەر بردنی ژیانی یەكتر سەركۆنە نەكەن؛ بەڵكوو تائەو جێگایەی كەدەگونجێت لە شێوازی ژیانی یەكتر رێز بگرن.

بۆ گەیشتن بە یەكگرتنی لەبارو شیاو، باش وایە كە جەخت لە سەر خاڵە هاوبەشەكان بكەینەوە چونكە ئەگەر وا نەبێت بە هۆی سەر قاڵ بوون بەخاڵە ناكۆكەكان لەگەیشتن بەئامانجەكانیان دەمێنینەوە.

ئێمە باوەرمان بە پەروەردەی پۆزەتیفی مرۆڤ هەیە كە لە جیاتی بیری تێكدەرانەو رووخێنەر، چاكسازی و بنیات نان لە مێشك و هزری دا جێگیر بووبێت، بەكەم ترین كەرەسەو دەرفەت و لە داخراوترین  مەودا و باروودۆخدا، رۆڵ و كاریگەری خۆی ببینێت، چاولەدەستی خەڵكانی تر نەبێت كە كەندو كۆسپەكانی ژیانی بۆ چارەسەركەن. بە بیانوی پێلانی دۆژمنان پاساو بۆ كەم و كورتی و هەڵەكانی خۆی نەهێنێتەوە، بەفێڵ وكەڵەكەی جوراوجوری شەر‌‌عی و سیاسی، چارەنووسی خۆی و كۆمەڵگاكەی بەخەڵكانی تر نەسپێرێت. بەبیانوی ئەوەی كە بارودۆخ و مرۆڤەكان خەراپ و گەندەڵن، ئەركی مرۆڤ دۆستانەی لەبیر نەكات. هاوكات لەگەڵ رەخنە، پێشنیار و ڕێنمونیشی هەبێت.  

ئیسلاح وێب بە شێوەیەكی شارستانیانە و سەردمیانەو، بەو پەڕی سینگ فراوانیەوە بۆ پێك هێنانی بواری گەشەو پەرەپێدانی هەمەلایەنەی ژیانەی تاكەكەسی و كۆمەڵایەتی خەڵكی ئیران بەگشتی و خەڵكی كوردوستانیش بەتایبەتی لە ژێر تێشكی بڕواداربوون بە كەڕامەتی زاتی مرۆڤ،ئازادی، دادپەروەری، قەبووڵ كردنی بیروڕای جیاواز و بایەخە رەوشتیە بنەرەتییەكان لەگشت سووچە كانی ژیان تێدەكۆشێت.

ئیسلاح وێب پێگەیەكە بۆ زانین،لێكۆڵینەوە، شیكردنەوەی رووداوەكان و بابەتە جۆربەجۆرەكانی وڵاتی كوردەواری، ئێران وجیهان . 

ئیسلاح وێب لە هەڵبژاردن و بڵاو كردنەوەی بابەتەكان دو پێوەری نەگۆڕاوی هەیە:

یەكەم) گەشە كردنی عەقڵانیەتی مرۆڤی كورد بە لە بەر چاوبوون و لەبیر نەكردنی « رەوشتی بەرزو داب ونەریتی ڕەسەنی كوردی» بەجۆرێك  بتوانێت لە جیهانی ئەمڕۆدا بژیت و مامەڵە و پێوەندی  ڕاستەو خۆ دەگەڵ ژیان و مرۆڤی سەردەم  بكات، بەڵام لە هەمان كات دا هەر كورد بێت و لاسای كەس نەكاتەوە.

دوو هەم) ئەم بڵاو كردنەوە، نەبێتە هۆی چەواشە كردنی كۆمەڵگای كوردەواری لەسەر ڕێگای خواناسین وخواپەرەستی كە لەچوار چێوەو قەوارەی تەفسیرێكی میانە لە ئایینی ئیسلام، كە زیاترلە1400 ساڵە خەڵكی كورد، دەگەڵی ژیاوەو بووەتە بەشێكی جیا نەكراوەی ژیانی ئەو گەڵە. ئەو ئیسلامەی دوورە لە هەر جۆرە تێڕوانینێكی تەسك و لار و لەوێر، چ لە ڕووی تووندڕەوی و بەستنەوەی ئیسلام  بە بیرو بۆ چوونی دەستەوتاقم و كەسایەتییەكی  تایبەتەوە لە دەرەوەی كوردوستان یا لە ناوەوە بێت. چ لەڕووی دوورخستنەوەی خەڵك، بە جۆرێك كە ئەوەندەی سڕ و كەڕ وكاسی بكەن، هەر وەك نەبێت وایە!

بەڵام پێمان واش نییە كە  ئەگەر ئەو ئێسلامە نەكرا بەئایدئۆلۆژیا و سیستمێكی سیاسی و بەناوی دەوڵەتی ئیسلامی،حوكمی پێ نەكرا، ئەوە ئیسلام تێداچووە و كۆمەڵگاكەشمان، كۆمە ڵگای موسڵمان نییە.

 ئەوەی مەبەستی سەرەكی ئێمە زیاتر خواپەرستی و دەگەڵ خوابوونی خەڵك و ئاوەدان كردنەوەی نیشتیمان و  ژیان وگوزەرانی خۆشی گەلمانە. وادەزانین ئەگەر خەڵك چەواشە نە‌كرێ و بەزۆرەملی بیروڕای سەیرو بەیری بەسەردا نەسەپێندرێت، ڕوو لەخوا و بەرنامەكەی خوا وەر ناگێرێت و لێی لانادات بەڵام هەر كات تاقم و گروپێك ویستوویانە بیرو بۆچوونی خۆیان بەسەر ئەم خەڵكەدا قاڵ بكەنەوە وبەفێڵ و تەڵەكە لەدڵی جەماوەری كورددا جێگای خۆیان  بكەنەوە، زۆری پێ نەچووە، خۆشیان وخەڵكەكەش تووشی زەرەرو زیان بوون و بۆ ماوەیەكی تر، ڕەوڕەوەی ژیان و وزەی گیانیان لەبەرەو پێشەوەچوون وەستاوەو هێزی تێدا نەماوە، هەر بۆیە ئەوەمان بۆ سەلماوەو چەسپاوە كە هیچ كەسایەتی ودەستەو تاقمێك بۆیان نیە خۆیان بەخاوەن و پێوەری ئەم خەڵكە بزانن، چ ئیسلامی بن، چ عەلمانی و  چ نەتەوەیی بەڵكو لە ڕاستی دا، خەڵك وجەماوەر خاوەن و گەورەی هەمووانە و پەسەند و ویستی گەل ، پێوەری بوون و  قەبارەی ئەوانە.

بۆ گەیشتن بەكۆمەڵگایەكی ئازاد، سەڕەڕای شارەزابوونی شارومەندان بە مافەكانیان، دەبێت بیری ڕەخنەیی لەواندا گەشەبسێنێت، واتە ئاستی بوێری شارومەندان دەبێ بگاتە رادەیەكی كە پرسیار كردن لە هەموو جۆرە پەیو‌ندیكی ناڕەوای سەپێندراو بەسەر كۆمەڵگادا لە هەموو بوارەكانی ڕامیاری،كۆمەڵایەتی، كلتووری و ئابووریدا  بە مافی خۆی بزانێ.

بڕوامان بە جیاوازی بێرو بۆچوون هەیەو وتووێژیش بە باش ترین ڕێگاچارە بۆ بردنەسەری  ئاستی تێگە یشتنی  بەرامبەری خاوەن بیرو ڕا جیاوازەكان دەزانین.

لە كۆتاییدا سەر بڵندی دونیاو دواڕۆژی بەڕێزتان ئاواتمانەو چاوەڕوانی یاریدەی فیكری هەموو لایەكین.

.:: نوێ‌ترین ::.